Strasburq, 24 iyun – Avropa Şurası Parlament Assambleyası (AŞPA) Azərbaycanda tənqidi səslərin susdurulması ilə bağlı narahatlığını ifadə edib. Assambleya bildirib ki, məhdudlaşdırıcı qanunvericilik tədbirləri nəticəsində müstəqil jurnalistika, real siyasi müxalifət, vətəndaş cəmiyyəti və ifadə azadlığı ciddi təzyiqlərlə üzləşib.

AŞPA-nın Strasburqda keçirilən plenar iclasında qəbul edilən qətnamədə hüquq müdafiəçisi, seçki müşahidəçisi və 2014-cü il Vatslav Havel İnsan Hüquqları Mükafatının laureatı olan Anar Məmmədlinin həbs və cinayət təqibi pislənilib. Həmçinin Azərbaycanda fəaliyyət göstərmiş müstəqil media qurumlarının əməkdaşlarına, jurnalistlərə, bloqerlərə, demokratiya tərəfdarlarına, müxalif siyasətçilərə və hüquq müdafiəçilərinə qarşı təzyiqlər tənqid olunub.

Qətnamədə siyasi məhbusların sayının artması ilə bağlı narahatlıq ifadə edilib. Bildirilib ki, 2026-cı ilin may ayında ölkədə siyasi məhbus kimi tanınan şəxslərin sayı 328 nəfərə çatıb. AŞPA eyni zamanda Avropa İnsan Hüquqları Məhkəməsinin Azərbaycanla bağlı bir sıra aparıcı qərarlarının hələ də icra olunmadığını qeyd edib.

Belçikalı deputat Kristof Lakruanın hazırladığı hesabat əsasında qəbul edilən sənəddə Azərbaycan hakimiyyəti Avropa Şurasının Nizamnaməsi, İnsan Hüquqları üzrə Avropa Konvensiyası və digər beynəlxalq insan hüquqları müqavilələri üzrə öhdəliklərinə hörmət etməyə çağırılıb.

Parlamentarilər jurnalist fəaliyyətinə, korrupsiya araşdırmalarına, demokratiyanın müdafiəsinə və insan hüquqları sahəsində fəaliyyətə görə hədəf seçilən şəxslərə qarşı təhdid və cinayət təqiblərinin dayandırılmasını, saxlanılanların dərhal azadlığa buraxılmasını tələb ediblər. Həmçinin AŞPA-nın 1900 saylı qətnaməsində müəyyən edilmiş meyarlara uyğun olaraq siyasi məhbus hesab edilən şəxslərin azad olunmasına çağırış edilib.

Assambleya vurğulayıb ki, Azərbaycanın AŞPA-ya parlament nümayəndə heyəti göndərməməsi ölkənin Avropa Şurası qarşısında götürdüyü öhdəlikləri yerinə yetirməməsi üçün əsas ola bilməz.

Qətnamədə Avropa Şurasının Baş katibi İnsan Hüquqları üzrə Avropa Konvensiyasının 52-ci maddəsi çərçivəsində səlahiyyətlərindən istifadə etməyə və Azərbaycan hakimiyyətindən ölkə qanunvericiliyinin Konvensiyanın effektiv tətbiqini necə təmin etməsi barədə izahat tələb etməyə çağırılıb.

AŞPA həmçinin Milli Məclisi Assambleya ilə dialoqu bərpa etməyə dəvət edib və Azərbaycanın Avropa Şurasının bütün qurumları ilə səmərəli əməkdaşlığının ölkənin öz maraqlarına uyğun olduğunu vurğulayıb.