Strasburq, 23 iyun 2026 – Avropa Şurasının “Youth Innovating Democracy – Towards a New Democratic Pact for Europe” (“Demokratiyada innovasiyalar: Avropa üçün yeni Demokratik Pakt istiqamətində”) adlı gənclər tədbiri 24–26 iyun 2026-cı il tarixlərində Strasburqdakı Avropa Gənclər Mərkəzində keçiriləcək.

Monakonun Nazirlər Komitəsinə sədrliyi çərçivəsində təşkil olunan tədbir Avropa Şurasının demokratiyanın yenilənməsinə yönəlmiş “Avropa üçün Yeni Demokratik Pakt” təşəbbüsünün mühüm mərhələlərindən biri hesab olunur.

Tədbirin açılış sessiyası iyunun 24-də baş tutacaq. Sessiyada Gənclər üzrə Birgə Şuranın sədri Lilya Elenkova, Avropa Gənclər Forumunun prezidenti Rareş Voicu, Avropa Şurasının Baş katibi Alain Berset və Monakonun Avropa Şurasındakı daimi nümayəndəsi, Nazirlər Deputatları Komitəsinin sədri Gabriel Revel çıxış edəcəklər.

Proqram çərçivəsində iyunun 24-də Avropa Şurası Parlament Assambleyasının Mədəniyyət, Elm, Təhsil və Media Komitəsinin Gənclər üzrə məruzəçisi Yevheniia Kravchuk ilə müzakirə, iyunun 26-da isə Parlament Assambleyasının prezidenti Petra Bayr ilə yekun sessiya və təkliflərin təqdimatı keçiriləcək.

Tədbirdə Avropanın müxtəlif ölkələrindən 100-dən çox gənc lider, fəal, dövlət və beynəlxalq qurum nümayəndələri, eləcə də vətəndaş cəmiyyəti təmsilçiləri iştirak edəcəklər. İştirakçılar demokratiyanın gələcəyi ilə bağlı fikir mübadiləsi aparacaq, mövcud çağırışları müzakirə edəcək və demokratik yenilənməyə dair innovativ təkliflər hazırlayacaqlar.

Forumun əsas nəticələrindən biri Avropa Şurasının 100 illiyinin qeyd olunacağı 2049-cu ilə həsr edilən “2049-cu il üçün Avropa Demokratiyası Manifesti”nin hazırlanması olacaq. Sənəddə demokratik innovasiyalar və Avropa üçün Yeni Demokratik Pakta daxil edilə biləcək konkret təşəbbüslər əks olunacaq.

Tədbir Avropa Şurasının Gənclər Departamenti tərəfindən European Youth Forum ilə tərəfdaşlıq çərçivəsində təşkil olunur.