Strasburq, 24 iyun 2026 – Avropa Şurası Parlament Assambleyası (AŞPA) Azərbaycanda tənqidi səslərin susdurulması ilə bağlı ciddi narahatlığını ifadə edib. Assambleya hesab edir ki, ölkədə qəbul olunan məhdudlaşdırıcı qanunvericilik tədbirləri müstəqil jurnalistikanın, real siyasi müxalifətin, vətəndaş cəmiyyətinin və ifadə azadlığının sıxışdırılmasına səbəb olub.

AŞPA-nın plenar iclasında qəbul edilən qətnamədə insan hüquqları müdafiəçisi, seçki müşahidəçisi və 2014-cü il Vatslav Havel İnsan Hüquqları Mükafatı laureatı Anar Məmmədlinin həbsdə saxlanılması və ona qarşı aparılan cinayət təqibi qətiyyətlə pislənib.

Sənəddə həmçinin Azərbaycanda fəaliyyət göstərmiş müstəqil media qurumlarının jurnalistləri və əməkdaşlarına, bloqerlərə, demokratiya tərəfdarlarına, müxalifət nümayəndələrinə və insan hüquqları müdafiəçilərinə qarşı repressiyaların davam etdiyi vurğulanıb. Bildirilib ki, onların bir qismi həbsdə, digərləri isə ev dustaqlığında saxlanılır.

AŞPA Azərbaycanda siyasi məhbusların sayının əhəmiyyətli dərəcədə artmasından da narahatlığını ifadə edib. Qətnaməyə görə, 2026-cı ilin may ayında ölkədə siyasi məhbus kimi tanınan şəxslərin sayı 328 nəfərə çatıb. Assambleya, eyni zamanda, Avropa İnsan Hüquqları Məhkəməsinin Azərbaycanla bağlı bir sıra aparıcı qərarlarının hələ də icra edilməməsinə diqqət çəkib.

Belçikalı deputat Kristof Lakruanın hazırladığı hesabat əsasında qəbul edilən qətnamədə Azərbaycan hakimiyyəti Avropa Şurasının Nizamnaməsindən, Avropa İnsan Hüquqları Konvensiyasından və digər beynəlxalq insan hüquqları sazişlərindən irəli gələn öhdəliklərə əməl etməyə çağırılıb.

Parlament Assambleyası jurnalist fəaliyyətinə, korrupsiya araşdırmalarına, demokratiyanın müdafiəsinə və insan hüquqları sahəsində fəaliyyətlərinə görə təqib olunan şəxslərə qarşı təhdid və cinayət təqiblərinin dayandırılmasını, habelə həbsdə olanların dərhal azadlığa buraxılmasını tələb edib.

Qətnamədə Azərbaycan hakimiyyətinin AŞPA-ya nümayəndə heyəti göndərməmək qərarından beynəlxalq öhdəliklərini yerinə yetirməmək üçün bəhanə kimi istifadə etməməli olduğu da vurğulanıb.

Bundan əlavə, AŞPA Avropa Şurasının Baş katibini Avropa İnsan Hüquqları Konvensiyasının 52-ci maddəsində nəzərdə tutulan səlahiyyətlərdən istifadə edərək Azərbaycan hakimiyyətindən Konvensiyanın ölkədaxili qanunvericilikdə necə təmin olunduğuna dair izahat tələb etməyə çağırıb.

Sonda Assambleya Azərbaycan parlamentini (Milli Məclis) AŞPA ilə dialoqu bərpa etməyə və Avropa Şurasının bütün qurumları ilə səmərəli əməkdaşlıq etməyə dəvət edib.