Rusiya qoşunlarının Xarkov şəhərinə aviasiya bombaları ilə hücumu nəticəsində bir nəfər ölüb, doqquz nəfər yaralanıb.

Xarkov meri İqor Terexovun məlumatına görə, iyunun 20-nə keçən gecə Rusiya ordusu şəhərin Xolodnoqorsk rayonuna idarə olunan aviasiya bombaları (KAB) ilə zərbələr endirib.

Hücum nəticəsində iki mərtəbəli yaşayış binasına zərbə dəyib. Axtarış-xilasetmə işləri zamanı dağıntılar altından bir nəfərin meyiti aşkarlanıb.

Xarkov vilayət hərbi administrasiyasının rəhbəri Oleq Sinequbov bildirib ki, hücum nəticəsində doqquz nəfər xəsarət alıb. Yaralananlar arasında 6 yaşlı uşaq da var. Beş nəfər xəstəxanaya yerləşdirilib, digər zərərçəkənlərə hadisə yerində tibbi yardım göstərilib.

Ukrayna Hərbi Hava Qüvvələrinin məlumatına görə, iyunun 20-nə keçən gecə Rusiya Ukrayna ərazisinə müxtəlif tipli 99 pilotsuz uçuş aparatı göndərib. Onlardan 92-nin vurulduğu bildirilib. Eyni zamanda yeddi PUA-nın üç ayrı əraziyə düşdüyü, daha üç ərazidə isə dağıntıların qeydə alındığı açıqlanıb.

Ukraynada digər hücumlar

Ukrayna tərəfinin məlumatına görə, bundan əvvəlki gecə də Rusiya ordusu Xarkovun Xolodnoqorsk rayonuna KAB bombaları ilə zərbələr endirib. Həmin hücum zamanı doqquz nəfər, o cümlədən dörd uşaq yaralanıb, 40-dan çox fərdi yaşayış evi və anbar binası zədələnib.

Rusiya hücumları nəticəsində Zaporojye şəhərində yanacaqdoldurma məntəqəsində yanğın baş verdiyi, iki nəfərin yaralandığı bildirilib.

Dnepropetrovsk vilayətinin Pavloqrad şəhərində dron hücumu nəticəsində 8 yaşlı qızın öldüyü, bir qadının isə yaralandığı açıqlanıb.

Odessa vilayətinin cənubunda mülki infrastruktura zərbələr endirildiyi, yük nəqliyyatı dayanacağında yanğın baş verdiyi və bir nəfərin öldüyü, dörd nəfərin yaralandığı qeyd olunub.

Bundan əlavə, Rusiya qüvvələrinin Qara dənizdə mülki gəmiləri dronlarla hədəfə aldığı bildirilib. Panama bayrağı altında üzən gəminin ekipaj üzvünün öldüyü, iki dənizçinin yaralandığı, Sent-Kits və Nevis bayraqlı gəmidə isə üç ekipaj üzvünün yüngül xəsarət aldığı açıqlanıb.