İyunun 22-də Azərbaycan Respublikasının Prezidenti İlham Əliyev və Türkmənistan Prezidenti Sərdar Berdiməhəmmədov mətbuata bəyanatlarla çıxış ediblər.

Bəyanatı zamanı Türkmənistan Prezidenti Sərdar Berdiməhəmmədov Azərbaycanla ikitərəfli münasibətlərin inkişafından məmnunluğunu ifadə edib. O, iki ölkə arasında əlaqələrin möhkəmlənməsində Azərbaycan Prezidentinin şəxsi töhfəsini xüsusi qeyd edərək buna görə minnətdarlığını bildirib.

Türkmənistan Prezidenti “Dostluq” neft tankerinin hədiyyə olunmasına görə də təşəkkür edib. Sərdar Berdiməhəmmədov bildirib ki, bu addım Azərbaycan və Türkmənistan arasında qardaşlıq münasibətlərinin rəmzi kimi qiymətləndirilir. O, tankerin hər iki ölkənin tərəqqisinə töhfə verəcəyinə və uğurlu əməkdaşlığın daha bir nümunəsi olacağına əminliyini ifadə edib.

Ali qonaq Türkmənistanın Azərbaycanla əməkdaşlığın daha da inkişaf etdirilməsinə böyük əhəmiyyət verdiyini vurğulayıb. Onun sözlərinə görə, Azərbaycan və Türkmənistan xalqlarını əsrlər boyu mehriban qonşuluq ənənələri, ortaq tarix, mədəniyyət, dil və mənəvi dəyərlər birləşdirir.

“Yekun olaraq qeyd etmək istərdim ki, Azərbaycan Respublikası tərəqqi və çiçəklənmə yolu ilə inamla irəliləyir”, — deyə Türkmənistan Prezidenti bildirib və Azərbaycan xalqına sülh, əmin-amanlıq və davamlı tərəqqi arzulayıb.

Qeyd edək ki, “Dostluq” tankeri Bakı Gəmiqayırma Zavodunda inşa edilib. 7875 ton dedveytə malik gəminin uzunluğu 141 metrdir. Tanker Azərbaycanın gəmiqayırma sənayesinin inkişafını nümayiş etdirməklə yanaşı, Azərbaycan-Türkmənistan dostluq münasibətlərinin daha da möhkəmlənməsinin nümunəsi hesab olunur.