Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDT) həbsdə olan sədri Anar Məmmədli və ictimai fəal Anar Abdullanın işinə baxış davam etdirilir. Növbəti məhkəmə iclası noyabrın 17-də hakim Aygün Qurbanovanın sədrliyi ilə keçirilib.

“Gözətçi” portalının məlumatına görə, prosesdə ilk olaraq vəkil Cavad Cavadlı Avropa İnsan Hüquqları Məhkəməsi (AİHM) yanında Azərbaycan hökumətinin səlahiyyətli nümayəndəsinə rəsmi sorğu göndərilməsi barədə vəsatət qaldırıb. Vəkil bildirib ki, tələb edilən sənədlər ittihamların hüquqi və faktiki əsaslarını tam şəkildə şübhə altına alan, eyni zamanda onların əsassız olduğunu göstərən məlumatları ehtiva edir.

Vəkil AİHM-in Anar Məmmədlinin əvvəlki həbsi ilə bağlı 2018-ci il qərarını xatırladaraq deyib ki, həmin qərarda həbsi qanunsuz sayılmasına baxmayaraq, “məhkumluq statusu” hələ də qüvvədə saxlanılır və bu, indiki işdə ağırlaşdırıcı hal kimi göstərilir.

Cavad Cavadlı həmçinin SMDT-nin qeydiyyata alınmaması ilə bağlı AİHM-in 12 yanvar 2023-cü il tarixli hökmünü əsas gətirib. Həmin qərarda Məhkəmə təşkilatın qeydə alınmamasını əsassız və özbaşına hesab edib və bunu birləşmək azadlığının pozuntusu kimi qiymətləndirib. Vəkil bildirib ki, dövlət bu pozuntunu aradan qaldırmaq əvəzinə, əksinə, təşkilatın bu günə qədər qeydiyyatsız olmasını Anar Məmmədliyə qarşı ittiham aktında sübut kimi təqdim edir.

Məhkəmə vəsatəti baxılmamış sayıb.

Daha sonra ictimai fəal Anar Abdulla ifadə verib və dövlət ittihamçısının suallarını cavablandırıb.

Növbəti məhkəmə iclası 8 dekabr saat 14:30-a təyin edilib və şahidlərin dindirilməsi ilə davam etdiriləcək.

Qeyd edək ki, Anar Məmmədli 2024-cü il aprelin 29-da saxlanılıb və o, qaçaqmalçılıqda ittiham olunur. O, özünü təqsirli bilmir. Bir sıra beynəlxalq insan haqları təşkilatları Anar Məmmədlini siyasi məhbus kimi tanıyır.