Bakı Ağır Cinayətlər Məhkəməsində ictimai fəal Anar Abdulla məhkəmə zalında həbs edilib. Proses Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədli və Anar Abdullanın cinayət işi üzrə keçirilib. Məhkəməyə hakim Aygün Qurbanova sədrlik edib.

Dövlət ittihamçısı Anar Abdullanın barəsində seçilmiş polisin nəzarətinə vermə qətimkan tədbirinin dəyişdirilməsi ilə bağlı vəsatət qaldırıb. Prokuror təqsirləndirilən şəxsin qətimkan tədbirinin şərtlərinə əməl etmədiyini əsas gətirərək onun dərhal məhkəmə zalında həbs olunmasını istəyib.

Anar Abdullanın vəkili müvəkkilinin anasının səhhətində ciddi problemlər olduğunu bildirib və bu məqamın nəzərə alınmasını xahiş etsə də, məhkəmə vəsatəti təmin edib. Beləliklə, Anar Abdulla birbaşa məhkəmə zalında həbs olunub.

Proses zamanı dövlət ittihamçısı cinayət işi üzrə ittiham aktını elan edib. Həm Anar Abdulla, həm də Anar Məmmədli elan olunmuş ittihamları qəbul etməyib və özlərini təqsirsiz elan ediblər.

Xatırladaq ki, Anar Abdulla bundan əvvəl – iyulun 11-də İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələblərinə tabe olmamaq) maddələri ilə 30 sutka inzibati həbsə məhkum edilmişdi. O, məhkəmədə bildirib ki, Atatürk prospektində avtobusdan düşərkən saxlanılıb və heç bir inzibati xəta törətməyib.

Hazırda o, Anar Məmmədli ilə birlikdə qaçaqmalçılıq da daxil olmaqla səkkiz maddə üzrə maliyyə cinayətlərində ittiham olunur. Təqsirləndirilən şəxslər həbslərinin siyasi motivli olduğunu, irəli sürülən ittihamların isə əsassız və saxta xarakter daşıdığını bəyan edirlər.