Tofiq Yaqublu artıq 12 gündür ki, qanunsuz olaraq həbsdə saxlanılır. Bu müddət erzində təcridxanada hər dəfə bir problem oldu. Ancaq qidayla bağlı problem artıq uzun illərdir həll olunmur. Bəxtiyar Hacıyev aclıq etdiyi dönəmlərdə bu barədə danışmaq etik olmadığı üçün heç nə yazmadım.

Ata səhhətiylə bağlı müalicə alırdı. Buna görə də normal qidalanması şərtdir. Ancaq həbsxanada bu mümkün deyil. Yeməklər o qədər keyfiyyətsizdir ki, ata məcburən aparılan peçenyə ilə qidalanmalı olur. Bir ay yalnız peçenyə ilə qidalanmaq nə deməkdir?
Müəssisə rəhbərliyi təcridxananı normal qida ilə təmin edə bilmirsə, sovqat qəbuluna qoyduqları məhdudiyyətləri aradan qaldırmalıdır. Hansı məntiqlə meyvə qadağan edilir, hələ də anlamıram. 2019-cu ildə yenə təcridxanaya sovqat aparırdım. Meyvənin qadağan olunmasıyla bağlı elə absurd bəhanə gətirdilər ki, adamı sanki ələ salırdılar. Dedilər dustaqlar meyvəylə kameranı zibilləyirlər.

Bilirəm ki, həmin təcridxana dövlət büdcəsi hesabına maliyyələşir. Yeməklərin yeyilə bilməyəcək qədər keyfiyyətsiz olması müəssisə rəhbərliyinin yeyinti etdiyini göstərir.

Həbsxanadakı qidayla bağlı problemin olduğunu əminəm ki, orada vaxtı ilə olanlar təsdiqləyər. Hətta bildirirdilər ki, 6-7 il qabaq qidayla bağlı vəziyyət belə deyilmiş.

Müəssisə qanunlarla deyil, rəisin şəxsi istəyi ilə idarə olunur. Görünən odur ki, rəis dustaqların qidası üçün ayrılan pula şəxsi biznesini inkişaf etdirir.

Azərbaycan Respublikasının Daxili İşlər Nazirliyi, tabeçiliyində olan müəssisənin fəaliyyətini araşdırın. Əminəm ki, böyük yeyinti faktları aşkarlayacaqsınız.

Tabeçiliyinizdə olan müəssisənizə nəzarəti gücləndirin.

Vilayət Eyvazov, Tofiq Yaqublunun səhhətindən siz məsuliyyət daşıyırsınız.

Nigar Həzi