Prezident İlham Əliyev “Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026–2035-ci illər üçün Dövlət Proqramı”nı təsdiq edib.

Prezidentin imzaladığı sərəncama əsasən, Nazirlər Kabineti Dövlət Proqramında nəzərdə tutulmuş tədbirlərin həyata keçirilməsini əlaqələndirməli və icrasına nəzarət etməlidir. Həmçinin, proqram üzrə görülən işlərin icra vəziyyəti barədə ildə bir dəfə Azərbaycan Respublikasının Prezidentinə məlumat təqdim olunacaq.

Dövlət Proqramında nəzərdə tutulmuş tədbirlərin monitorinqi və qiymətləndirilməsi Azərbaycan Respublikası Nazirlər Kabinetinin sifarişi əsasında İqtisadi İslahatların Təhlili və Kommunikasiya Mərkəzi tərəfindən həyata keçiriləcək.

Sərəncama əsasən, Maliyyə Nazirliyi və İqtisadiyyat Nazirliyi proqramda nəzərdə tutulan tədbirlərin maliyyələşdirilmə mexanizmlərinə uyğun olaraq hər il dövlət büdcəsinin və dövlət investisiya proqramlarının tərtibi zamanı zəruri maliyyə vəsaitinin ayrılmasını təmin etməli, həmçinin digər maliyyə mənbələrindən vəsaitlərin cəlb edilməsi istiqamətində müvafiq tədbirlər görməlidirlər.

Qeyd edək ki, Dövlət Proqramının əsas məqsədi Bakı şəhəri və Abşeron yarımadasında su təchizatı sistemlərinin müasirləşdirilməsi, yağış və tullantı sularının effektiv idarə olunması, ekoloji tarazlığın qorunması və əhalinin dayanıqlı su təminatının yaxşılaşdırılmasıdır.