Həbsdə olan siyasi fəal Samir Aşurovun aclıq aksiyasını dayandırdığı bildirilir. Bu barədə onun həyat yoldaşı Nuranə Aşurova yanvarın 4-də sosial şəbəkə hesabında məlumat yayıb.

Onun sözlərinə görə, Samir Aşurov saxlanıldığı 2 saylı Cəzaçəkmə Müəssisəsinin rəhbərliyinin ona qarşı bir daha zorakılıq edilməyəcəyi ilə bağlı verdiyi vəddən sonra aclığı dayandırıb. N.Aşurova aclıq aksiyasının həyat yoldaşının səhhətinə ciddi təsir etdiyini, ciyərlərində ağrılar yarandığını və ayaqüstə durmaqda çətinlik çəkdiyini də qeyd edib.

Qeyd edək ki, Samir Aşurov dekabrın 28-də aclıq aksiyasına başlamışdı. O, müəssisə rəisi Vüsal Aslanov tərəfindən fiziki zorakılığa məruz qaldığını iddia edirdi.

Xatırladaq ki, 2023-cü il martın 29-da Almaniyadan deportasiya olunan Samir Aşurov 20 gün sonra polis tərəfindən saxlanılıb. O, bir şəxsə bıçaqla xəsarət yetirməkdə ittiham edilib. Bakı Ağır Cinayətlər Məhkəməsinin 2023-cü il dekabrın 18-də çıxardığı hökmə əsasən, S.Aşurov Cinayət Məcəlləsinin 126.2-ci və 221.3-cü maddələri ilə təqsirli bilinərək 6 il 6 ay müddətinə azadlıqdan məhrum edilib.

Samir Aşurov ittihamları qəbul etmir, siyasi fəaliyyətinə görə cəzalandırıldığını bildirir. Hüquq müdafiəçiləri isə onu siyasi məhbus kimi tanıyıblar.