Yanvarın 22-də Günəşin yaxınlığında Yerə ən yaxın üç planet — Merkuri, Venera və Marsın iştirakı ilə planetlər paradı baş verəcək.

Bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası məlumat yayıb.

Alimlərin bildirdiyinə görə, Venera və Mars artıq Günəşə yaxınlaşaraq ötən Milad bayramı ərəfəsində qarşıdakı iki əsr üçün nadir hesab olunan birləşmə yaradıb və hazırda bir-birindən uzaqlaşırlar. Hazırda Venera Günəşdən sola, Mars isə sağa doğru hərəkət edir.

Yanvarın 22-də isə Merkuri, Venera, Mars və Günəş səmada son simmetrik konfiqurasiyada düzülərək, tərəfləri 2–3 dərəcə olan, demək olar ki, düzgün romb və ya xaç formasını yaradacaq. Mütəxəssislərin sözlərinə görə, bundan sonra planetlər paradı tədricən dağılmağa başlayacaq.

Qeyd olunub ki, yanvarın sonuna qədər Günəşdən ilk uzaqlaşan ən sürətli planet Merkuri olacaq. Fevral ayı ərzində isə əvvəlcə Venera, daha sonra Mars Günəşdən uzaqlaşacaq.

İnstitutun məlumatına görə, bu cür səma hadisəsi növbəti dəfə yalnız 2038-ci ilin sentyabrında müşahidə olunacaq.