Göyüşovların Azərbaycandan Almaniyaya qədər uzanan biznes şəbəkəsi

İpoteka və Kredit Zəmanət Fondu “Satmaq öhdəliyi ilə kirayəyə vermə mexanizmi üzrə yaşayış sahələrinin satın alınması” tenderinin nəticələrini elan edib.

Satınalma portalının məlumatına görə, tenderin qalibi “Körpü-Bina-Tikinti” MMC (VÖEN- 3100026151) olub.

Qalib şirkətlə ümumilikdə dəyəri 138 milyon 800 min 96 manat məbləğində müqavilə imzalanıb.

Şirkət haqqında daha ətraflı

Kommersiya qurumunun hüquqi şəxslərin dövlət reyestrinə daxil edilmiş məlumata görə “Körpü-Bina-Tikinti” MMC şirkəti 17 sentyabr 2001-ci ildə dövlət qeydiyyatına alınıb, nizamnamə kapitalı 300 min manat təşkil edir.

Şirkətin hazırda qanuni təmsilçisi Göyüşov Xaliq Avdil oğludur.

Hüquqi ünvanı Nərimanov rayonu, Əhməd Rəcəbli 2, ev 1 ünvanında yerləşir. Şirkət yarandığı tarixdən etibarən Bakıda və bölgələrdə çox milyonluq dövlət sifarişli layihələri həyata keçirib.

Şirkətin əsas sahibləri kimdir?

Şirkətin tarixçəsində MMC-nin ilk qanuni təmsilçisinin Xəlil Əbdül oğlu Göyüşov olduğu görünür.

Ölkədə bina-yol-körpülərin tikinti maqnatı kimi tanınan Xəlil Göyüşov 2012-ci ildə Prezident İlham Əliyev tərəfindən inşaat sahəsində səmərəli fəaliyyətlərinə görə “Tərəqqi” medalı ilə təltif edilib.

Bundan əlavə, reyestrdə Xəlil Göyüşovun adına daha 4 şirkət mövcuddur: “Çaytumas” MMC, “İnkişaf” MMC, “Qərb Ulduzu – Mənzil Tikiniti Koorperativi” MMC və “M.Füzuli” MMC.

Xəlil Göyüşovun adı mütəmadi şəkildə “MTN işi” ilə bağlı səs-küylü məhkəmədə Eldar Mahmudovun adamı kimi çəkilib.


Oğlu Ramiz Göyüşovun da Azərbaycanda “Göyüş İnşaat MMC” adlı şirkəti var. Həmçinin Almaniyanın kommersiya qurumlarının dövlət reyestri bazasına istinadən görmək olur ki, Ramiz Xəlil oğlu Göyüşovun adına 2014-cü ildə qeydiyyatdan keçmiş 4 şirkət mövcuddur:

“AGO Park Hotel Betriebs GmbH” (aktivləri 420 min avro), “AGO Management GmbH” (aktivləri 157 min avro), “AGO Betreibergesellschaft mbH” (aktivləri 826 min avro) və “AGO GmbH” şirkətləri.

Şirkətlərin nəzdində isə Almaniyanın Hamburq şəhərində iki otel mövcuddur: biri 40 milyon avro dəyərində hesablanan “Park Hotel Hamburg Arena” adlı dəbdəbəli hoteldir. Üç ulduzlu hotelin 105 qonaq otağı, 2 banket otağı, mehmanxana barı və yay bağı var, digəri isə 4 ulduzlu “Park Hotel am Berliner Tor” adlı hoteldir.

Almaniyada 2014-cü ildə yaranan, nizamnamə Kapitalı 100.000 avro olan “AGO GmbH” şirkətinin icraçı direktoru Xaliq Göyüşovdur.

Bu yuxarıda adı hallanan həmin “Körpü-Bina-Tikinti” MMC şirkətinin hazırki qanuni təmsilçisi kimi görünən Göyüşov Xaliq Avdil oğludur.

Bundan əlavə, oğul Ramiz Göyüşovun adına Bakıda “90GR009, 90OV849, 90GR108, 90OX872” dövlət nişanlı bir neçə bahalı avtomobil kolleksiyası mövcuddur.

Kolleksiyaya “Mercedes-Benz G-Class”, “LEXUS”, “Range Rover”, “BMW X6”, “Cadillac”, “Bentley”, “Maserati” kimi luks markalı avtomobillər daxildir.

Şirkət haqqında əlavə nələri bilirik?

Şirkətin saytında qeyd olunub ki, 1997-ci ildən Azərbaycanın hər yerində avtomobil yollarının, körpülərin, tunellərin, yol ötürücülərinin, binaların tikintisi ilə məşğul olan şirkətdir.

Oktyabrın 22-də Bakının Sabunçu rayonu ərazisində yağan yağışlara görə sel sularının tunelə dolması nəticəsində iki nəfər vətəndaş bataraq həlak olmuşdu.

Daha sonra Baş Prokurorluq Sabunçu tunelindəki faktla bağlı araşdırma aparıldığını, cinayət işinin açıldığını bildirmişdi.

Jurnalistlərin “Niyə tunellərdə, küçələrdə sular bu qədər yığılır?” – sualına isə Bakı Şəhər İcra Hakimiyyətinin başçısı Eldar Əzizov deyib ki, işlər görülərkən qüsurlara yol verilib.

O, bu məsələlərin araşdırılacağını bildirmişdi. Sonradan məlum olmuşdu ki, bu tunel 2019-cu ildə “Azərbaycan Dəmir Yolları”nın sifarişi əsasında “Körpü Bina Tikinti” MMC tərəfindən inşa edilib.

Şirkətin direktor müavini Rüfət Göyüşov (şəxsin adı Almaniyadakı şirkətlərin sənədlərində də hallanır) ittihamları rədd edərək mətbuata bu açıqlamanı verib:

“Tunel dövlət layihəsidir, sifariş əsasında tikilib. Layihəni tərtib edən də, sifarişi verən də müvafiq dövlət orqanıdır (“Azərbaycan Dəmir Yolları” QSC). Sifarişdə nə göstərilibsə, iş buna uyğun yerinə yetirilib. Körpü, onun konstruksiyası, betonu dayanıqlıdır. Tuneldəki motorlar da layihədə iki ədəd göstərilibsə, 3 ədəd qoyulub. Şirkət motor istehsalçısı deyil. Tunel uçmayıb, anbar aşmayıb. Hamısı yerindədir. Qoyulan motorlar Azərbaycan bazarında sertifikatlaşdırılmış motorlardır. Tikinti zamanı heç bir nöqsan olmayıb. İstər su motoru olsun, istərsə də saç qurudan fen, bu, qurğudur, içində motor işləyirsə, nə vaxtsa xarab olmalıdır. Fövqəladə vəziyyət yaranıb. Bakı Şəhər İcra Hakimiyyətinin başçısı necə analiz edib, bunu deyə bilmərəm. Motorlar işlək vəziyyətdə olub”.

Dövlət qurumları və şirkət günahı bir-birinin üstünə atsa da, həyatını itirən şəxslərin ailələri məsul şəxslərin cəzalanmasını tələb edirdi. Lakin hadisənin üzərindən 3 ay keçməsinə baxmayaraq, araşdırma aparıldığı bildirilsə də, indiyə qədər heç bir yekun nəticə ictimaiyyətə açıqlanmayıb. Əvəzində məlum şirkət hələ də dövlət əhəmiyyətli tenderləri udmağa davam edir.