Sayt indiyədək dərc etdiyi korrupsiya araşdırmaları ilə bağlı Baş Prokurorluğun araşdırma aparıb-aparmadığını sorğulayıb

“AbzasMedia” Qarabağ və Şərqi Zəngəzur iqtisadi rayonlarında aparılan yenidənqurma layihələri ilə bağlı Baş Prokurorluğa müraciət edib.

Cinayət-Prosessual Məcəlləsinin 206-cı maddəsinə əsasən, törədilmiş və ya hazırlanan cinayətlər haqqında media subyektlərinin məlumatları cinayət işinin başlanması üçün əsas hesab olunur.

Müraciətdə “AbzasMedia”nın dərc etdiyi 10-dək araşdırmadan bəhs olunur. Bu araşdırmalar Füzuli Hava Limanının tikintisi, Qarabağda əkin-biçinlə məşğul olan şirkətlər, Ağdamda məcburi köçkünlərin evlərinin xarabalıqları üzərində tikilən özəl biznes obyektləri, sakinlər üçün inşa edilən yaşayış binaları, Prezidentin köməkçisinin qardaşına həvalə olunan “Ağıllı kənd” layihəsi, Şuşa və Qazaxın işğaldan azad edilən kəndlərində şəhərsalma işləri, Prezidentin ailə biznesini idarə etmiş nazir müavini, tikintiyə cəlb olunmuş Türkiyə şirkətlərinin udduğu layihələrlə bağlıdır.

Dövlət büdcəsindən maliyyələşən bu layihələr Prezident İlham Əliyevə, Prezidentin Təhlükəsizlik xidmətinin rəisi Bəylər Eyyubova, Dövlət Təhlükəsizlik Xidmətinin rəhbəri Əli Nağıyevə, Dövlət Şəhərsalma və Arxitektura Komitəsinin sədr müavini İlqar İsbatova, xarici işlər nazirinin müavini Yalçın Rəfiyevə, elm və təhsil nazirinin müavini Kənan Kərimzadə və Türkiyənin Prezidenti Rəcəb Tayyib Ərdoğana yaxın olan şəxslər və şirkətlərə həvalə olunub.

Araşdırmalar zamanı məlum olub ki, Azərbaycan Konstitusiyasının, “Hüquqi şəxslərin dövlət qeydiyyatı və dövlət reyestri haqqında”, “Dövlət satınalmaları haqqında”, “Korrupsiyaya qarşı mübarizə haqqında”, “Dövlət qulluqçularının etik davranış qaydaları haqqında”, “Dövlət qulluğu haqqında”, “Torpaq icarəsi haqqında” Qanunun, eləcə də Torpaq Məcəlləsi və Mülki Məcəllənin tələbləri kobud şəkildə pozulub.

“AbzasMedia” Baş Prokurorluqdan sorğuya qanunda nəzərdə tutulan müddətdə cavab verməsini tələb edib.

“AbzasMedia” Azərbaycanda fəaliyyət göstərən qeyri-kommersiya təşkilatı və müstəqil media orqanıdır. 2016-cı ildə Ülvi Həsənli daxil olmaqla bir qrup vətəndaş cəmiyyəti nümayəndəsi tərəfindən təsis edilib. Fəaliyyəti əsasən korrupsiya araşdırmaları ilə bağlı olub.

“AbzasMedia” tərəfindən 2022–2023-cü illər ərzində Azərbaycan Prezidenti İlham Əliyevin ailə üzvləri, Xarici işlər naziri Ceyhun Bayramov, Xüsusi Dövlət Mühafizə Xidmətinin rəisinin müavini Bəylər Eyyubov, Dövlət Təhlükəsizlik Xidmətinin rəisi Əli Nağıyevlə bağlı araşdırmalar, o cümlədən Heydər Əliyev Fondu və “PAŞA Holding”ə aid tenderlər barədə materiallar dərc olunub.

Həmçinin “Araşdırılmayan cinayətlər” seriyasında metropoliteninin sabiq rəisi Tağı Əhmədov, Slavyan Universitetinin sabiq rəhbəri Nurlana Əliyeva, sabiq Ordu Korpusunun komandiri Hikmət Həsənov, sabiq mer Hacıbala Abutalıbov, sabiq deputat Elmira Axundova, sabiq nazir Hüseynqulu Bağırov və hazırda Baş nazirin müavini olan Samir Şərifovun, general-leytenant Mais Bərxudarovun, sabiq millət vəkili Ziyad Səmədzadənin, maliyyə naziri Sahil Babayevin, general-leytenant, Baş Qərargahın sabiq rəisi Nəcməddin Sadıkovun adının hallandığı cinayətlər barədə də araşdırma materialları verilib.

Azərbaycanda dövlət rəhbərliyi ətrafında korrupsiya araşdırmalarına görə “AbzasMedia”nın 6 əməkdaşı – baş direktor Ülvi Həsənli, müavini Məhəmməd Kekalov, baş redaktor Sevinc Vaqifqızı, reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalı həbs edilib.

2023-cü ilin noyabrından etibarən sıra ilə həbs olunmağa başlayan jurnalistlərə qarşı qaçaqmalçılıq ittihamı irəli sürülüb.

2024-cü il mayın 31-də isə “Azadlıq” radiosunun jurnalisti, iqtisadçı Fərid Mehralızadə saxlanılıb, evində axtarış aparılıb. İyunun 1-də ona qarşı “AbzasMedia işi” üzrə Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Xətai rayon Məhkəməsinin qərarı ilə onun barəsində həbs qətimkan tədbiri seçilib.

Elə həmin gün “AbzasMedia” bəyanat yayaraq Fərid Mehralızadənin bu media qurumu ilə heç bir əməkdaşlığının və əlaqəsinin olmadığını bildirib.

Daha sonra bu iş üzrə həbs edilənlərlərin hər birinə qarşı maliyyə məsələlərilə bağlı əlavə 7 ağır maddə üzrə ittiham irəli sürülüb.

Ümumilikdə 2023-cü ilin noyabrından başlayaraq Azərbaycanda qruplar halında 20- yə yaxın jurnalist, ictimai fəal qaçaqmalçılıq ittihamı ilə həbs edilib. Onların heç biri ittihamla razılaşmır, bunu peşə fəaliyyətləri və siyasi sifariş ilə izah edirlər.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.

Yerli və beynəlxalq hüquq müdafiə təşkilatları bu təqibləri siyasi motivli hesab edir və həbs olunanların azad edilməsinə, onlara qarşı ittihamların geri götürülməsinə çağırırlar.