Qırğızıstanda fəaliyyət göstərən müstəqil “Kloop” media qurumunun bir sıra jurnalistləri və əməkdaşları son günlərdə saxlanılıb və istintaqa cəlb olunub. Mayın 28-də və 29-da baş tutan bu həbslərin rəsmi səbəbi kimi “kütləvi iğtişaşlara çağırışda iştirak” ittihamı göstərilir.

“Kloop”un yaydığı məlumata görə, saxlanılanlardan ikisi – videoqraf Aleksandr Aleksandrov və keçmiş əməkdaş Joomart Duulatov bu ittihamla həbs olunub. Məhkəmənin qapalı şəkildə keçirdiyi iclasdan sonra onların barəsində 1,5 ay müddətinə Dövlət Milli Təhlükəsizlik Komitəsinin istintaq təcridxanasında saxlanma qərarı çıxarılıb. Onlara qarşı irəli sürülən ittihamların konkret mahiyyəti açıqlanmayıb.

Məlumata əsasən, Aleksandrov və Duulatov Dövlət Təhlükəsizlik Komitəsinin əməkdaşları tərəfindən saxlanılaraq, evlərində axtarış aparılıb və avadanlıqları götürülüb.

Bununla yanaşı, Oş və Bişkek şəhərlərində daha üç nəfər – jurnalist Zıyagül Bolot qızı, əməkdaş Ayday Erkebayeva və 2023-cü ildə istefa vermiş keçmiş redaktor Zara Sadıqəliyeva saxlanılıb. Onlar altı saatdan artıq vəkil iştirakı olmadan dindirildikdən sonra sərbəst buraxılıblar.

Mayın 29-da Bişkekdə “Kloop”un daha iki əməkdaşı – 20 yaşlı Abdil Torobayev və inzibati işçi saxlanılıb. Torobayev bir neçə saatlıq vəkilsiz dindirmədən sonra azad edilib. İnzibati işçi isə texniki ofisdə aparılan axtarışda iştirak etməyə məcbur edilib, daha sonra o da sərbəst buraxılıb. Mayın 30-da isə redaksiya ilə əməkdaşlıq edən bir mühasib saxlanılıb.

“Kloop” qeyd edir ki, Qırğızıstan Prezident Administrasiyasının mətbuat katibi jurnalistlərə yönələn bu təzyiqlərin səbəbi kimi onların apardığı araşdırmalara eyham vurub.

Hadisə ölkədə söz və media azadlığı ilə bağlı ciddi narahatlıqlar doğurub. Müxtəlif yerli və beynəlxalq insan haqları təşkilatları bu həbsləri siyasi təqib kimi qiymətləndirir.