Milli Şuranın üzvü Gültəkin Hacıbəyli barəsində Türkiyəyə 5 il müddətinə giriş qadağası və deportasiya ilə bağlı rəsmi qərar qəbul edilib.

Bu barədə o, Türkiyə Prezidenti Rəcəb Tayyib Ərdoğana ünvanladığı müraciətdə məlumat verib. Hacıbəyli bildirib ki, Türkiyədə 2 illik rəsmi yaşayış icazəsi olduğu və indiyədək heç bir qanun pozuntusuna yol vermədiyi halda, bu qərar onun üçün gözlənilməz və ədalətsizdir.

“Bu gün mənə 5 il müddətinə Türkiyədən deport olunmağımla bağlı rəsmi qərar təqdim olundu. Qərarın hansı əsasla verildiyi isə açıqlanmır”, – deyə o qeyd edib.

Onun sözlərinə görə, noyabrın 29-dan etibarən heç bir hüquqi əsas olmadan deportasiya mərkəzində saxlanılması ilə bağlı məhkəməyə müraciət olunub:

“Məhkəmə qərarını gözləmədən belə bir qərarın qəbul edilməsi onun hüquqi deyil, siyasi əsaslarla verildiyini göstərir”.

Gültəkin Hacıbəyli hazırda Arnavutköy Geri Göndərmə Mərkəzindən Çatalca Geri Göndərmə Mərkəzinə köçürüldüyünü bildirib. Onun sözlərinə görə, bu mərkəzdə saxlanılan şəxslər adətən daha qısa müddətdə deportasiya edilir:

“Belə bir təəssürat yaranır ki, mənim məcburi qaydada Azərbaycana göndərilməyim üçün hazırlıq aparılır”.

Siyasətçi müraciətində Türkiyəni özünün “ikinci Vətəni” adlandıraraq, bu ölkənin hüquq və ədalət prinsiplərinə güvəndiyini vurğulayıb. O qeyd edib ki, Türkiyənin Azərbaycan hakimiyyətinin siyasi repressiyalarına dəstək verməsi ciddi tarixi məsuliyyət yaradacaq:

“Qardaş Türkiyə dövləti demokratiyaya qarşı savaş açmış Azərbaycan hakimiyyətinin siyasi rəqiblərini saxta ittihamlarla həbs etməsinə dəstək verməməlidir”.

Qeyd edək ki, Gültəkin Hacıbəyli noyabrın 30-na keçən gecə İstanbulda kirayə yaşadığı evdən Taksim Polis Şöbəsinə aparılıb və daha sonra deportasiya mərkəzinə yerləşdirilib.

Hökumətyönlü medianın məlumatına görə, hadisə AXCP sədri Əli Kərimli və partiyanın Rəyasət Heyətinin üzvü Məmməd İbrahimin həbsi ilə bağlı aparılan istintaq fonunda baş verib. Həmin həbslər Prezident Administrasiyasının sabiq rəhbəri Ramiz Mehdiyevin cinayət işi ilə əlaqələndirilir.

Dekabrın 1-də Səbail Rayon Məhkəməsi Əli Kərimli və Məmməd İbrahim barəsində Cinayət Məcəlləsinin 278.1-ci maddəsi (hakimiyyəti zorla ələ keçirməyə və dövlətin konstitusiya quruluşunu zorla dəyişdirməyə yönələn hərəkətlər) üzrə 2 ay 15 gün müddətinə həbs qətimkan tədbiri seçib.