Türkiyədə Çatalca Geri Göndərmə Mərkəzində saxlanılan Gültəkin Hacıbəyli Türkiyənin Milli İstihbarat Təşkilatının (MİT) rəhbəri İbrahim Kalına müraciət edərək açıqlama yayıb.

Hacıbəylinin bildirdiyinə görə, saxlanıldığı mərkəzə özünü Canan Ulusoy kimi təqdim edən bir qadın gəlib və Moskvada olduğu deyilən vəkil Kamil Tağıyev adından onunla görüşmək istədiyini bildirib. Görüş zamanı Moskvadan siyasi mesajlar çatdırmaq niyyətinin olduğu iddia olunub.

Gültəkin Hacıbəyli bu təklifi qəti şəkildə rədd etdiyini və məsələ ilə bağlı dərhal mərkəzin səlahiyyətli şəxslərini məlumatlandırdığını açıqlayıb. Onun sözlərinə görə, hadisə ilə əlaqədar olaraq MİT-ə müraciət edilib və həmin şəxslərin kimliyinin araşdırılması xahiş olunub.

Qeyd edək ki, Gültəkin Hacıbəyli artıq 20 gündən çoxdur Türkiyədə saxlanılır. O, Ramiz Mehdiyev işi üzrə istintaqa cəlb edilməsi məqsədilə Azərbaycan hüquq-mühafizə orqanlarının müraciəti əsasında tutulub.

Məlumata görə, Hacıbəyli bu müddət ərzində Azərbaycana qaytarılmamaq üçün müxtəlif instansiyalara müraciətlər edir. Bildirilir ki, onu Türkiyədə PKK-ya yaxınlığı ilə tanınan bəzi siyasi dairələr, DEM Partiyası və bir sıra deputatlar müdafiə edirlər.