Avropa İttifaqı Çexiya, Macarıstan və Slovakiyanı Ukraynanın maliyyələşdirilməsindən və 90 milyard avroluq kredit mexanizminə qoşulmaqdan imtina etdiklərinə görə siyasi bədəl ödəməyə məcbur edəcək.

Bu barədə “Financial Times” qəzeti yüksək vəzifəli Avropa rəsmisinə istinadən yazıb.

“Onlar maliyyə baxımından ödəməli deyillər, amma biz onları siyasi olaraq bunun üçün pul ödəməyə məcbur edəcəyik”, – deyə Avropa rəsmisi nəşrə bildirib.

Qəzet qeyd edir ki, 19 dekabrda Aİ tərəfindən təsdiqlənən və Ukraynaya Aİ büdcəsi hesabına kredit verilməsini nəzərdə tutan sxem Çexiya, Macarıstan və Slovakiya üçün birbaşa maliyyə öhdəliyi yaratmır. Səbəb isə bu ölkələrin Ukraynanın maliyyələşdirilməsi üçün Aİ vəsaitlərindən istifadəyə açıq dəstək verməməsidir.

“Financial Times” əlavə edir ki, Ukraynaya kredit ayrılması üçün Aİ-nin ümumi büdcəsindən istifadə edilməsini ilk olaraq Fransa və İtaliya təklif edib.