Çatalca Geri Göndərmə Mərkəzində saxlanılan Gültəkin Hacıbəyli onun barəsində verilmiş qərarların hüquqi əsasının olmadığını bildirir. O, sosial şəbəkədə yaydığı açıqlamada Sülh Cəza Məhkəməsinin saxlanılması ilə bağlı şikayətini təmin etmədiyini və İdari Məhkəmənin qərarınadək qapalı şəraitdə saxlanılmasına qərar verdiyini qeyd edib.

Açıqlamada bildirilir ki, Türkiyədə 2 illik oturma icazəsi olmasına və heç bir qayda pozuntusu törətməməsinə baxmayaraq, hansı əsasla faktiki olaraq həbsdə saxlanıldığı ona izah edilməyib. Fəal vurğulayıb ki, barəsində 5 illik deportasiya qərarı mövcud olduğu halda, Türkiyə dövləti ondan yalnız ölkə ərazisini tərk etməyi tələb edə bilərdi.

Onun sözlərinə görə, məhkəmə qərarı olmadan, Göç İdaresi Başkanlığının deportasiya qərarı və Azərbaycandan göndərildiyi iddia edilən sorğu əsasında saxlanılması hüquqi dövlət prinsiplərinin kobud şəkildə pozulmasıdır. Açıqlamada G-82 kodu əsasında ona “dövlət təhlükəsizliyi üçün təhdid yaradan xarici terror təşkilatının üzvü” kimi xüsusi sərt nəzarət rejiminin tətbiq olunması da sual altına qoyulub.

Hacıbəyli bildirib ki, deportasiya qərarına baxmayaraq, onun Türkiyə ərazisini tərk edərək istədiyi üçüncü ölkəyə getməsinə də icazə verilmir. Qaldırdığı suallara verilən yeganə cavabın isə “Ankaradan göstəriş var” olduğu iddia edilir.

Açıqlamada qeyd olunub ki, bu cür yanaşma Azərbaycan ictimai rəyində Türkiyəyə olan etimad və sevgiyə ciddi zərbə vurur. Fəal Türkiyə hakimiyyətini məsuliyyətə çağıraraq bildirib ki, bu suallara təkcə bu gün deyil, gələcəkdə də tarix qarşısında cavab vermək lazım gələcək.

O, sonda vurğulayıb ki, Azərbaycan–Türkiyə qardaşlığının təməlində hakimiyyətlərin maraqları deyil, iki xalqın qarşılıqlı güvən və sevgisi dayanır və bu güvənə xələl gətirməyə heç kimin haqqı yoxdur.