Rəsmi təqdimatlarda Azərbaycan Cənubi Qafqazın iqtisadi lideri kimi göstərilsə də, əhalinin rifah göstəriciləri bu iddianın tam təsdiqini tapmadığını göstərir. Müqayisə təkcə Gürcüstanda orta aylıq əməkhaqqının dollar ifadəsində Azərbaycandan 35% yüksək — təxminən 860 dollar olması ilə məhdudlaşmır.

Gürcüstanın rəsmi statistika qurumunun ev təsərrüfatlarının istehlak xərcləri üzrə aylıq sorğusuna əsasən, 2025-ci ilin noyabrında orta aylıq xərclər 3125 lari (təxminən 2000 manat) təşkil edib. Azərbaycanda isə 2024-cü il üzrə ev təsərrüfatları büdcə müayinəsi və 2025-ci ilin inflyasiya göstəriciləri nəzərə alındıqda, analoji məbləğin təxminən 1600 manat olduğu görünür. Bu da Gürcüstanla müqayisədə təxminən 20% azdır.

Rəsmi statistikaya görə, Azərbaycanda yoxsulluq səviyyəsi 5%, Gürcüstanda isə təxminən 10% göstərilir. Lakin xərclərin strukturu bu fərqin reallığı əks etdirmədiyini göstərir. “Engel qanunu”na əsasən, qida xərclərinin ümumi xərclərdə payı nə qədər yüksəkdirsə, yoxsulluq da bir o qədər yüksək olur. Gürcüstanda 2025-ci ilin noyabrında ərzaq xərclərinin payı 34,5%, Azərbaycanda isə təxminən 43% olub. Bu göstəricilər Azərbaycanda yoxsulluğun Gürcüstandan aşağı olmadığını deməyə əsas verir.

Xərclərin bölgüsündə də ciddi fərqlər mövcuddur. Azərbaycanda ev təsərrüfatları ümumi xərclərinin cəmi 1,7%-ni təhsilə, 5,2%-ni səhiyyəyə yönəldir. Gürcüstanda isə təhsilin payı 5,1%, səhiyyənin payı isə 8,2% təşkil edir. Kommunal xərclərin payı Gürcüstanda 9,8%, Azərbaycanda isə 8%-dir. İstirahət, mədəniyyət və ictimai iaşə xərcləri Azərbaycanda 11%, Gürcüstanda isə təxminən 7% səviyyəsindədir.

Diqqətçəkən məqamlardan biri də Gürcüstan statistika qurumunun yaratdığı “fərdi inflyasiya kalkulyatoru”dur. Bu alət vətəndaşlara şəxsi istehlak səbətinə uyğun inflyasiya səviyyəsini hesablamağa imkan verir və rəsmi inflyasiya göstəricilərinə ictimai etimadın formalaşmasına xidmət edir.