Azərbaycan Xalq Cəbhəsi Partiyasının (AXCP) Nəzarət Təftiş Komissiyasının sədri Murad Sultanlı 30 sutka inzibati qaydada həbs edilib. Bu barədə dekabrın 18-də partiyanın rəsmi məlumatında bildirilib.

Hazırda onun həbsinin təfərrüatları və konkret ittihamlarla bağlı əlavə məlumat verilmir. Murad Sultanlı ilə əlaqənin dekabrın 16-dan itib getdiyi qeyd olunurdu.

Xatırladaq ki, AXCP sədrı Əli Kərimli də daxil olmaqla partiyanın 20-yə yaxın üzvü hal-hazırda həbsdədir. Əli Kərimli və AXCP Ali Məclisinin katibi Məmməd İbrahim dekabrın 1-də sabiq Prezident Administrasiyası rəhbəri Ramiz Mehdiyevə qarşı açılmış cinayət işi çərçivəsində həbs qətimkan tədbiri ilə azadlıqdan məhrum ediliblər.

Təqsirləndirilən şəxslərə Cinayət Məcəlləsinin hakimiyyəti zorla ələ keçirməyə cəhd maddəsi ilə ittiham irəli sürülüb. Onlar isə ittihamları rədd edir və həbslərini hakimiyyətin sifarişi ilə baş verən siyasi addım kimi qiymətləndirirlər.