“Həm “toplumçular”, həm “abzasçılar”, həm də “meydançılar” xalqın haqq səsidirlər, onlara dəstək olmaq vicdan məsələsidir”

Meydan TV ilə əməkdaşlıqda günahlandırılaraq, qaçaqmalçılıq ittihamı ilə həbs olunmuş, “Arqument.az” saytının rəhbəri Şəmşad Ağayev (Ağa) hökumətyönlü mediada haqqında yazılan ittihamlara cavab verib. O, həbsdən yazdığı məktubunda hökumətyönlü mediada yazılanları “iftira” adlandırıb.

“Hökumətyönlü media yenə sicilləmə yazılarla istintaqın yalanlarını tirajlayıb. Hələ bir qədər irəli gedərək məni Meydan TV-nin yeni rəhbəri də qoyublar. Bu qədər absurd və gülünc iddialar yalnız Azərbaycanda uydurula bilər”.

Həbsdə olan jurnalist bildirib ki, “fakt kimi” ortaya qoyulan fotolar dəlil ola bilməz.

“3 il öncə xaricdə təlimdə olmuşam. Hökumət mediasının yaydığı və fakt kimi sırıdığı fotolar da həmin təlimdəndir. Həmin fotoların bəzilərini də öz sosial media hesabımdan da paylaşmışam. Bunlar sanki “Amerikanı yenidən kəşf ediblər””.

Jurnalist məktubunda yazır ki, azadlıqda olarkən həbs olunmuş həmkarlarına dəstək verməyi özünün vicdan məsələsi hesab edib.

“Meydan TV-nin əməkdaşları həbs edildikdən sonra onlara açıq dəstək vermişəm, hüquqlarını müdafiə etmişəm. Bu yazılar da rəhbəri olduğum “Arqument.az” saytında dərc olunub. Həm “toplumçular”, həm “abzasçılar”, həm də “meydançılar” bu ölkənin, xalqın haqq səsidirlər, onlara dəstək olmaq vicdan məsələsidir”.

Şəmşad Ağa məktubunda Meydan TV-nin rəhbəri təyin olunması ilə bağlı hökumətyönlü mediada yazılan məlumatları isə “gülünc” adlandırıb.

“Meydan TV-nin rəhbəri olmağım, ora işçilər cəlb etməyimlə bağlı iddialar gülüncdür. Meydan TV kimi həqiqəti yazan və yayan bir orqanın rəhbəri olmaq qürurverici olardı”.

Jurnalist yazıb ki, həbsdə olduğu müddətdə tanımadığı insanlardan Meydan TV-yə gördüyü münasibət onu sevindirib. O yazıb ki, “xalqa “milyonluq yalanlar” keçmir, o “ağı qaradan ayıra bilir””.

“Bu qədər günahsız insanı, qadın-kişi demədən şərləyib tutan ədalətsiz hakimiyyətə etiraz etmək, öz həmkarlarını dəstəkləmək, onların yarımçıq qalan işlərinə kömək etmək, hüquqlarını müdafiə etmək bir vicdan borcudur. Bunu etdiyimə görə qətiyyən peşman deyiləm”.

O, özünün və həmkarlarının həbsini siyasi qərar hesab etdiyini bildirib.

“Həbsimiz və bu sistematik repressiya dalğası siyasi qərardır. Heç bir yalan və manipulyasiya bu həbslərin siyasi motivini dəyişdirə bilməz”.

“İfadə azadlığı müqəddəsdir və qalib gələcək! Bütün günahsız dostlarıma və həmkarlarıma azadlıq tələb edirəm!”,- jurnalist məktubunun sonunda qeyd edib.

Jurnalist Şəmşad Ağayev (Ağa) fevralın 5-də “Meydan TV işi” ilə bağlı saxlanılıb. Ona qarşı “MeydanTV işi” üzrə Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Fevralın 6-da onun barəsində 2 ay 1 gün müddətinə həbs qətimkan tədbiri seçilib.

2024-cü il dekabrın 6-da Meydan TV-nin əməkdaşları Ramin Deko (Cəbrayılzadə), Aynur Qənbərova (Elgünəş), Aysel Umudova, Aytac Əhmədova (Tapdıq), Xəyalə Ağayeva, Natiq Cavadlı saxlanılıblar. Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Bu maddə ilə onların barəsində istintaq dövrü üçün 4 aylıq həbs qətimkan tədbiri seçilib.

Meydan TV əməkdaşları ilə yanaşı, eyni gündə vətəndaş cəmiyyətinin üzvü Ülvi Tahirov da saxlanılıb. Eyni ittihamla onun da barəsində 4 aylıq həbs qətimkan tədbiri seçilib. Ülvi Tahirovun Meydan TV-yə aidiyyəti yoxdur.

Fevralın 20-də isə jurnalist Nurlan Libre (Qəhrəmanlı) “Meydan TV” ilə əlaqəli cinayət işinə görə saxlanılıb. Məhkəmənin qərarı ilə onun barəsində 1 ay 17 gün müddətinə həbs qətimkan tədbiri seçilib.

Fatimə Mövlamlı da fevralın 28-də “Meydan TV” ilə əlaqəli cinayət işinə görə saxlanılıb. Xətai Rayon Məhkəməsi martın 1-də istintaq dövrü üçün jurnalistin 1 ay 9 gün müddətinə həbs olunması qərarını çıxarıb.

Saxlanılan jurnalistlərin evində axtarış aparılıb, telefonları, kompüterləri və digər şəxsi əşyaları götürülüb.

Həbs olunan jurnalistlər özlərini təqsirli bilmir, Meydan TV əməkdaşlarının tənqidçi fəaliyyətlərinə görə cəzalandırıldıqlarını bəyan ediblər.

Hazırda oxşar ittihamlarla 30-dək jurnalist, ictimai fəal həbsdədir. Onlar ittihamı qəbul etmir, peşə fəaliyyətləri ilə əlaqələndirirlər. Hakimiyyət təmsilçiləri ölkədə siyasi motivli həbslərin olmadığını deyirlər.

Beynəlxalq insan haqları qurumları, Qərb rəsmiləri də hökuməti haqsız tutulanları azad etməyə çağırırlar.