Baş Prokurorluğun İstintaq İdarəsi tərəfindən aparılan cinayət işi çərçivəsində qiyabi icraatla istintaqa cəlb olunan bir qrup şəxs – İmaməddin Əlimanov, Süleyman Süleymanlı, Elşad Məmmədov, Məhəmməd Mirzəli, Qabil Məmmədov, Orxan Ağayev və Qurban Məmmədov barəsində həbs qətimkan tədbiri seçilib.

Baş Prokurorluğun müvafiq təqdimatlarına Binəqədi rayon Məhkəməsində baxılıb və məhkəmə təqdimatları təmin edib. Məhkəmənin qərarına əsasən, adları çəkilən şəxslər barəsində həbs qətimkan tədbiri seçilib.

Qeyd olunur ki, sözügedən şəxslər barəsində qiyabi icraatın başlanması və onların istintaqa çağırılması Baş Prokurorluğun İstintaq İdarəsi tərəfindən həyata keçirilib. Onların hansı ittihamlarla təqsirləndirildikləri barədə rəsmi məlumat verilməsə də, istintaqın davam etdiyi bildirilir.

Bundan başqa, istintaqa cəlb olunan digər şəxslər barəsində də məhkəmə tərəfindən qətimkan tədbirinin seçilməsi üçün yaxın günlərdə yeni təqdimatların verilməsi gözlənilir.

Hazırda adıçəkilən şəxslərin ölkə hüdudlarından kənarda olduğu ehtimal edilir. Onların beynəlxalq axtarışa verilib-verilmədiyi barədə rəsmi qurumlar tərəfindən məlumat verilməyib.

Baş Prokurorluq məsələ ilə bağlı ictimaiyyəti məlumatlandıracağını bəyan edib.