Hərbi Prokurorluğun İstintaq İdarəsində bir qrup hərbi qulluqçu və onlarla əlbir olan mülki şəxslə bağlı cinayət işi başlanılıb.

Prokurorluqdan Foto.info.az-a verilən məlumata görə, Müdafiə Nazirliyinin hərbi qulluqçusu Azad Məmmədovun N saylı hərbi hissədə xidmət rəisi vəzifəsində çalışdığı dövrdə külli miqdarda vəsaitin mənimsənilməsi və digər qanunsuz əməllərə yol verdiyinə dair əsaslı şübhələr müəyyən edilib.

İstintaq zamanı həmçinin, hüquqi şəxsə faktiki rəhbərlik edən mülki şəxs Cahangir Hüseynovun da müxtəlif hərbi qulluqçularla əlbir olaraq mənimsəmə cinayətində iştirak etdiyi üzə çıxıb. Toplanmış sübutlar əsasında hər iki şəxs – Azad Məmmədov və Cahangir Hüseynov – Azərbaycan Respublikası Cinayət Məcəlləsinin 179.3.2-ci (külli miqdarda mənimsəmə) maddəsi ilə təqsirləndirilən şəxs qismində cəlb olunublar.

Məhkəmənin qərarı ilə Cahangir Hüseynov barəsində həbs qətimkan tədbiri seçilib. Azad Məmmədov barəsində isə istintaq müddətində başqa yerə getməmək barədə iltizam qətimkan tədbiri tətbiq olunub.

Hazırda cinayət işi üzrə ibtidai istintaq davam etdirilir. Hərbi Prokurorluq bildirir ki, istintaq çərçivəsində digər iştirakçıların da müəyyən edilərək məsuliyyətə cəlb olunması istiqamətində tədbirlər görülür.