“Azərbaycan hakimiyyəti tənqid edən hər kəsə gözdağı verir”

“Amnesty International” təşkilatı “Abzas Media işi” üzrə 7 jurnalistin uzunmüddətli həbslə cəzalandırılmasını kəskin şəkildə qınayıb. Təşkilatın yaydığı bəyanatda bildirilir ki, Azərbaycanda məhkəmə sistemi artıq müstəqil jurnalistikanın boğulması üçün bir vasitəyə çevrilib.

Bəyanatda təşkilatın Şərqi Avropa və Mərkəzi Asiya üzrə direktoru Mari Straters deyib:

“Yüksək səviyyəli korrupsiya faktlarını ifşa edən jurnalistlərə qarşı uydurma ittihamlar irəli sürməklə Azərbaycan hakimiyyəti ölkədə onlara meydan oxumağa cəsarət edən hər kəsə gözdağı verir. Bu qəbuledilməzdir və beynəlxalq ictimaiyyətdən sərt, aydın cavab tələb olunur.”

Straters həmçinin vurğulayıb ki, Azərbaycanda bu gün müşahidə edilən siyasi repressiyalar “dərin və sistemlidir”, lakin beynəlxalq birlik hələ də buna qarşı “vahid və prinsipial mövqe” ortaya qoya bilməyib.
O, Avropa İttifaqı kimi qurumları insan haqları pozuntularını görməzdən gələrək Azərbaycanla enerji sazişlərinə üstünlük verməkdə ittiham edib.

“Abzas Media” işinə dair hökm
İyunun 20-də Bakı Ağır Cinayətlər Məhkəməsi “Abzas Media” işi üzrə direktor Ülvi Həsənli, baş redaktor Sevinc Vaqifqızı, jurnalist Hafiz Babalı, reportyorlar Nərgiz Absalamova və Elnarə Qasımova, tərcüməçi Məhəmməd Kekalov və iqtisadçı Fərid Mehrəlizadəyə 7 il yarımdan 9 ilədək azadlıqdan məhrumetmə cəzası verib.

Onlara qarşı “valyuta qaçaqmalçılığı”, “çirkli pulların yuyulması”, “vergidən yayınma” və “sənədlərin saxtalaşdırılması” kimi maddələrlə ittiham irəli sürülüb. “Amnesty International” bu ittihamların “siyasi motivli” və “jurnalistləri susdurmaq məqsədi güdən qisasçı addım” olduğunu bəyan edir.

Təşkilat qeyd edir ki, “Abzas Media”nın materiallarında Qarabağda müharibədən sonrakı bərpa layihələri və dövlətə yaxın şirkətlərlə bağlı maliyyə pozuntuları ifşa olunub. Məhkəmə prosesində isə müdafiə tərəfi etibarsız sübutlar, şahid ifadələrinin dəyişdirilməsi və prosessual pozuntulara diqqət çəkib.

Çağırış: Bütün siyasi məhbuslar azad edilməlidir
Mari Straters beynəlxalq ictimaiyyəti Azərbaycan hökumətinə real təzyiq göstərməyə çağırıb:

“‘Abzas Media’ jurnalistləri, ‘Toplum TV’, ‘Meydan TV’, ‘Kanal 13’ əməkdaşları və ifadə azadlığından istifadə etdiyinə görə həbs edilən bütün şəxslər dərhal azad olunmalıdır. Hökumət tənqidçi səsləri boğmaq məqsədi ilə həyata keçirdiyi kampaniyaya son verməlidir.”

“Amnesty International”ın açıqlamasına görə, hazırda Azərbaycanda ən azı 25 jurnalist həbsdədir. Təşkilat qeyd edir ki, Azərbaycan Avropa Şurasına üzv olduqdan sonra siyasi motivli ittihamlarla jurnalistləri ən çox həbs edən ölkələrdən biri sayılır.

Azərbaycan hökuməti isə bu iddiaları qəbul etmir və jurnalistlərin peşə fəaliyyətinə görə deyil, konkret qanun pozuntularına görə məsuliyyətə cəlb edildiyini bildirir.