USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Vəkilin Hacı Vəliyevin işi üzrə Ombudsmana müraciəti nəticəsiz qalıb
İctimai fəal və “Gənc Qazilər” İctimai Birliyinin keçmiş sədri Hacı Vəliyevin saxlanma şəraiti ilə bağlı Azərbaycan Respublikasının İnsan Hüquqları üzrə Müvəkkili – Ombudsmana edilən müraciət cavabsız qalıb.
Bu barədə vəkil Aqil Layıc məlumat yayıb. Onun sözlərinə görə, Ombudsman Aparatı Hacı Vəliyevin vəziyyətini yerində araşdırmaq əvəzinə, müraciəti Baş Prokurorluğa yönləndirib. Daha sonra isə Baş Prokurorluq sənədləri Sabunçu rayon Prokurorluğuna göndərib. Vəkil qeyd edir ki, müraciətə iyulun 1-də baxılması istənsə də, indiyə qədər heç bir dövlət qurumu fəalın vəziyyəti ilə maraqlanmayıb.
Hacı Vəliyev İkinci Qarabağ Müharibəsindən sonra qazilərin və şəhid ailələrinin sosial problemlərini ictimailəşdirən ictimai fəal kimi tanınıb. Bu il martın 18-də o, küçə ticarətilə məşğul olan qazilərin polis müdaxiləsinə məruz qalması ilə bağlı videomaterial yayımlayıb.
Bundan bir neçə gün sonra – martın 31-də 2-ci qrup əlil olan Hacı Vəliyev polis tərəfindən saxlanılıb. O, əvvəlki dövrlərdə Cinayət Məcəlləsinin 221-ci (xuliqanlıq) maddəsi üzrə istintaqa cəlb edilib. Lakin bu dəfə ona qarşı irəli sürülən ittihamın konkret motivi açıqlanmayıb. Vəliyev isə ittihamları rədd edir.
İctimai fəal iyunun 21-də ona qarşı çıxarılmış “ədalətsiz məhkəmə hökmünə” etiraz olaraq aclıq aksiyasına başlamışdı. Bir müddət sonra isə aksiyanı dayandırıb.
Vəkil Aqil Layıc hüquq müdafiə institutlarının və Ombudsman Aparatının bu məsələdəki passivliyini tənqid edərək, Hacı Vəliyevin hüquqlarının pozulduğunu bildirir.
