USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Hacı Vəliyevin səhhəti ağırlaşıb – 16 gündür aclıq aksiyası keçirir
Həbsdə olan İkinci Qarabağ müharibəsi iştirakçısı, “Gənc Qazilər” İctimai Birliyinin keçmiş sədri Hacı Vəliyevin səhhətinin pisləşdiyi bildirilir. Bu barədə onun hüquqlarının müdafiəsi məqsədilə yaradılmış “Facebook” səhifəsində məlumat yayılıb.
Məlumatda qeyd olunur ki, Hacı Vəliyev iyulun 7-də ailəsi ilə telefon əlaqəsi zamanı mədə ağrılarının şiddətləndiyini və danışmaqda çətinlik çəkdiyini bildirib. Ailəsi və yaxınları onun sağlamlıq vəziyyəti ilə bağlı ciddi narahatlıq içində olduqlarını açıqlayıb.
“Qazi Hacı Vəliyev heç olmasa, hazırkı mərhələdə ev dustaqlığına buraxılmalıdır”, – deyə sosial mediada yayılan çağırışda bildirilir.
Hacı Vəliyev 2025-ci il iyunun 21-dən etibarən aclıq aksiyası keçirir. O, həbsinə etiraz olaraq bu addımı atdığını bəyan edib.
Qeyd edək ki, Hacı Vəliyev 2025-ci il martın 18-də küçə ticarəti ilə məşğul olan qazilərə qarşı polis müdaxiləsini əks etdirən videomaterial yayımlamışdı. Martın 31-də o, polis tərəfindən saxlanılıb.
Ona qarşı Cinayət Məcəlləsinin 221.3-cü (xuliqanlıq – silah və ya silah qismində istifadə olunan əşyalardan istifadə etməklə törədildikdə) və 186.1-ci (özgənin əmlakını qəsdən məhv etmə və ya zədələmə) maddələri ilə ittiham irəli sürülüb. Vəliyev bu ittihamları qəbul etmir.
“Gənc Qazilər” İctimai Birliyi 2021-ci ildə “Qarabağ Qaziləri” İB-nin nəzdində yaradılıb. 2025-ci il mayın 28-də isə birliyin fəaliyyəti dayandırılıb.
