Həbsdə olan İkinci Qarabağ müharibəsi iştirakçısı, “Gənc Qazilər” İctimai Birliyinin sabiq sədri Hacı Vəliyevin Bakı İstintaq Təcridxanasında işgəncəyə məruz qaldığı bildirilir.

Bu barədə onun vəkili Aqil Layıc iyunun 30-da məlumat yayıb. Vəkilin sözlərinə görə, Hacı Vəliyev iyunun 23-dən 27-dək cərimə kamerasında – karserdə saxlanılıb. Layıcın dediyinə görə, bu cəzanın səbəbi Vəliyevin təcridxana rəisinin təqdim etdiyi və daxil intizam qaydalarını pozduğunu təsdiqləyən sənədə imza atmaqdan imtina etməsi olub.

“Vəliyev karserdə saxlanıldığı müddətdə fiziki zorakılığa məruz qalıb. Onun dediyinə görə, Tural adlı gizir tərəfindən döyülüb. Başında iki sıyrıq var. Bildirdi ki, başı dəfələrlə kafelə çırpılıb,” – deyə vəkil qeyd edib.

Hacı Vəliyev həmçinin iyunun 21-dən aclıq aksiyasına başladığını bildirib. Onun sözlərinə görə, bu, “ədalətsiz və sifarişli mühakiməyə” etiraz əlamətidir. Aclığın nəticəsi olaraq Vəliyev demək olar ki, hərəkət edə bilmir.

Vəkil Aqil Layıc Ədliyyə Nazirliyini və Ombudsman Aparatını məsələyə dərhal reaksiya verməyə, işgəncə iddialarını araşdırmağa və müvafiq hüquqi tədbirlər görməyə çağırıb.

Hacı Vəliyev martın 31-də Bakı Şəhər Baş Polis İdarəsinin əməkdaşları tərəfindən saxlanılıb. Ona qarşı Cinayət Məcəlləsinin 221.3 (xuliqanlıq, silah və ya silah qismində əşyalardan istifadə etməklə) və 186.2.1 (əmlakın qəsdən məhv edilməsi) maddələri ilə ittiham irəli sürülüb.

Tənqidçilər bu həbsi onun ictimai fəaliyyətinə – şəhid ailələrinin və qazilərin sosial problemlərini gündəmə gətirməsinə, habelə məmur özbaşınalığını ifşa etməsinə qarşı siyasi sifarişli təzyiq kimi qiymətləndirirlər.

Xatırladaq ki, Vəliyev martın 18-də polisin Yasamalda qazilərə qarşı zorakı davranışını ictimailəşdirmişdi. Mayın 14-də keçirilən məhkəmə iclasında o bəyan edib ki, həbsinin səbəbi məmur tənqidləri və qazilərin müdafiəsi ilə bağlı fəaliyyətidir.

Bu hadisə təkcə Hacı Vəliyevin deyil, ümumilikdə Qarabağ qazilərinin, şəhid ailələrinin və vətəndaş cəmiyyətinin hüquqlarının necə tapdandığını bir daha göstərir. Dövlət qurumlarının susqunluğu isə bu işgəncə və ədalətsizlik iddialarına səssiz razılıq təsiri bağışlayır.