USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Məhkəmə 28 gündür aclıq edən Hacı Vəliyevi ev dustaqlığına buraxmadı
İyulun 18-də Xətai Rayon Məhkəməsi ictimai fəal və İkinci Qarabağ Müharibəsi iştirakçısı Hacı Vəliyevin həbs qətimkan tədbirinin ev dustaqlığı ilə əvəz edilməsi barədə vəsatətə baxaraq onu təmin etməyib. Bu barədə məlumat ictimai fəalın yaxınları tərəfindən yayılıb.
Məlumatda qeyd olunur ki, Hacı Vəliyev artıq 28 gündür aclıq aksiyası keçirir və səhhəti ciddi şəkildə pisləşib. Yaxınlarının sözlərinə görə, uzun müddətli aclıq səbəbindən Vəliyev yeriməkdə çətinlik çəkir və görmə qabiliyyətini tamamilə itirmək təhlükəsi ilə üz-üzədir.
“Aidiyyatı qurumlar məsuliyyətli davranmalı, Qazi Hacı Vəliyevin həyat və sağlamlığına laqeyd yanaşmamalıdır”, – ailəsi bəyan edib.
Hacı Vəliyev iyunun 21-dən “ədalətsiz mühakiməsinə qarşı” aclıq aksiyasına başladığını açıqlayıb. O, martın 31-də Bakı Şəhər Baş Polis İdarəsinin əməkdaşları tərəfindən saxlanılıb və Cinayət Məcəlləsinin silahdan və ya silah qismində istifadə olunan əşyalardan istifadə edilməklə xuliqanlıq, eləcə də özgənin əmlakını qəsdən məhv etmə və ya zədələmə maddələri ilə ittiham olunur.
Vəliyev müharibədə həlak olanların ailələrinin və qazilərin problemlərini ictimailəşdirməsi, dövlət orqanlarını bu sahədə məsuliyyətə çağırması və məmurları tənqid etməsi ilə tanınıb. O, martın 18-də Yasamal rayonu ərazisində küçə ticarəti ilə məşğul olan qazilərə qarşı polis zorakılığı haqqında məlumat yaymışdı.
Mayın 14-də keçirilən məhkəmə iclasında Hacı Vəliyev bəyan etmişdi ki, həbsinin səbəbi onun ictimai fəaliyyəti və qazilər, şəhid ailələri ilə bağlı məsələləri gündəmə gətirməsidir.
Hazırda rəsmi qurumlardan bu məsələ ilə bağlı hər hansı açıqlama verilməyib.
