Azərbaycan Ordusunun qazisi Hacı Vəliyevin işgəncəyə məruz qaldığı bildirilir. Ailəsinin verdiyi məlumata görə, o, fiziki zorakılığa məruz qalıb və baş nahiyəsindən xəsarət alıb. Qazinin ailəsi bildirir ki, son telefon danışığında Hacı Vəliyev danışmaqda ciddi çətinlik çəkib və səsinin zəifliyi onun səhhətində ciddi problem olduğunu göstərib.

Hacı Vəliyevin ailə üzvləri onun sağlamlıq durumu ilə bağlı dərin narahatlıq keçirdiklərini deyirlər. Onlar bildirirlər ki, qazinin başına nə gəldiyi, niyə xəsarət aldığı və hansı şəraitdə saxlandığı barədə onlara heç bir rəsmi məlumat verilməyib.

Ailə ictimaiyyətə və aidiyyəti dövlət qurumlarına müraciət edərək, Hacı Vəliyevin səhhətinin dərhal araşdırılmasını, ona tibbi yardım göstərilməsini və bu barədə həm ailəsinə, həm də ictimaiyyətə rəsmi və şəffaf məlumat verilməsini tələb edir:

“Biz, Hacı Vəliyevin ailəsi olaraq, onun hal-hazırda hansı vəziyyətdə olduğunu bilmirik. Telefon danışığı zamanı onun danışa bilməməsi, səsinin gücsüzlüyü və ailəyə məlumat verilməməsi bizi çox ciddi şəkildə narahat edir. Qazimizin səhhəti ilə bağlı təcili araşdırma aparılmasını və hüquqları pozulubsa, buna görə cavabdeh şəxslərin məsuliyyətə cəlb olunmasını istəyirik.”

Məsələ ilə bağlı hələlik rəsmi qurumlar tərəfindən açıqlama verilməyib. Lakin Hacı Vəliyevin qazı statusu və əvvəlki xidmətləri nəzərə alınaraq onun səhhətinin nəzarətdə saxlanılması və hüquqlarının tam təmin olunması tələb edilir.

Hüquq müdafiəçiləri də məsələni diqqətdə saxladıqlarını və Hacı Vəliyevin işgəncəyə məruz qalması iddiasının araşdırılması üçün müvafiq instansiyalara müraciət ediləcəyini bildiriblər.