İkinci Qarabağ Müharibəsi iştirakçısı, “Gənc Qazilər” İctimai Birliyinin sədri Hacı Vəliyev həbsdə saxlanılıb.

Bu gün, mayın 14-də Xətai Rayon Məhkəməsində Hacı Vəliyevin ev dustaqlığına buraxılması ilə bağlı vəkilinin təqdim etdiyi vəsatətə baxılıb. Məhkəməyə hakim Aygün Həsənova sədrlik edib. Prosesin yekununda vəsatət təmin olunmayıb və Vəliyevin həbsdə saxlanılması barədə qərar qüvvədə qalıb.

Cərimə kamerasına salınıb

Məhkəmə prosesi zamanı məlum olub ki, Hacı Vəliyev mayın 8-də – ötən həftənin cümə axşamı günü üç gün müddətinə cərimə kamerasına (karserə) salınıb. Bu barədə məlumat “Gənc Qazilər” İctimai Birliyi tərəfindən yayılıb. Bildirilib ki, Vəliyev özü bu barədə bu gün keçirilən məhkəmədə danışıb.

Onun sözlərinə görə, bu cəzanın tətbiqinə səbəb həkimlə arasında baş verən mübahisə olub. Mübahisə Vəliyevin tibbi müayinəsi zamanı yaranıb. O, həkimə qazilik statusunu və yaralarının ağrıdığını bildirdikdə, həkimin “Cəhənnəmə ki, qazisən” şəklində cavab verdiyi iddia olunub. Məhz bu ifadədən sonra mübahisə daha da alovlanıb və nəticədə Vəliyev karserə salınıb.

İctimai birlik həmçinin qeyd edir ki, Hacı Vəliyevin pensiya və prezident təqaüdü kartı da bloklanıb.

İttihamlar və saxlanılma səbəbi

Hacı Vəliyev martın 18-də küçə ticarətilə məşğul olan qazilərə qarşı polis müdaxiləsini əks etdirən videomaterial yayımlayıb. Bu videoda, o, qazilərin qarşılaşdığı təzyiqləri ictimailəşdirib. Elə bu video ilə bağlı paylaşımından sonra, martın 31-də hüquq-mühafizə orqanları tərəfindən saxlanılıb.

Ona qarşı Cinayət Məcəlləsinin 221.3-cü (xuliqanlıq – silah və ya silah qismində istifadə olunan əşyalardan istifadə etməklə törədilməsi) və 186.1-ci (özgənin əmlakını qəsdən məhv etmə və ya zədələmə) maddələri ilə ittiham irəli sürülüb. Lakin Vəliyev bu ittihamları qəbul etmir və siyasi sifarişlə həbs olunduğunu bildirir.

Psixiatriya xəstəxanasına köçürülməsi

Mayın 12-də Hacı Vəliyev 1 Saylı Respublika Psixiatriya Xəstəxanasına köçürülüb. İctimaiyyətə açıqlanan rəsmi səbəb onun tibbi müşahidə altında saxlanılması zərurəti ilə izah edilsə də, tərəfdarları bu addımı onun susdurulması məqsədi daşıyan təzyiq vasitəsi kimi qiymətləndirirlər.

Hacı Vəliyev İkinci Qarabağ Müharibəsindən sonra qazilərin, xüsusən də döyüşlərdə sağlamlığını itirmiş hərbçilərin hüquqları uğrunda mübarizə aparan ictimai fəalların ön sıralarında yer alıb. Onun həbsi və hazırkı vəziyyəti cəmiyyətdə geniş rezonans doğurub və sosial şəbəkələrdə fəal müzakirə olunmaqdadır.

Hazırda onun işinə dair istintaq davam edir. Vəkilləri isə qərardan apellyasiya şikayəti verməyə hazırlaşırlar.