Həbsdə olan bloger Rəşad Ramazanov 15 saylı cəzaçəkmə müəssisəsində saxlanma şəraitinin ağır olmasından danışıb.

Bu barədə Turan agentliyinə koloniyadan zəng edərək özü məlumat verib.

Onun sözlərinə görə, koloniyada 1500 məhkum saxlanılır.

“Burada antisanitariya hökm sürür, tualetlər çatışmır, biz daim sidik və nəcis qoxusu nəfəs alırıq. Yer çatışmazlığı səbəbindən məhbuslar növbə ilə yatır. Bəziləri yerdə yatır”, - Ramazanov bildirib.

O, iddia edir ki, yemək üçün cəmi 30 dəqiqə vaxt ayrılır və çoxlu sayda insanın yemək yeməyə vaxtı qalmır.

"Məhkumlara verilən yeməklər isə keyfiyyətsizdir", - Ramazanov qeyd edib.

Eyni zamanda, onun sözlərinə görə, məhbuslara evdən gətirilən yeməklərin verilməsinə məhdudiyyətlər qoyulur.

Ramazanov həbsxana kafe və mağazasında qiymətlərin baha olmasından da şikayətlənib.

Onun sözlərinə görə, kazarmada soyuqdur. “Bizimlə məhbus kimi davranırlar, kobud danışırlar, hədə-qorxu gəlirlər, tibb məntəqəsində dərman vermirlər”, - Ramazanov qeyd edib.

Möminlər üçün yaradılan, həbsxana məscidində dindarlar namaz qılarkən müəssisənin kafesində yüksək səslə musiqi səslənir.

Ramazanov onu da qeyd edib ki, bloggerin şikayətlərini ictimailəşdirməmək üçün yaxınlarına təzyiqlər edilir.

O, məhbusların aclıq aksiyası keçirməyi planlaşdırdıqlarını və onların arasında özünün də olacağını bildirib.

*Rəşad Ramazanov 20 may 2022-ci ildə saxlanılıb, ertəsi gün Cinayət Məcəlləsinin 234.4.3-cü maddəsilə (külli miqdarda narkotik maddənin qanunsuz dövriyyəsi) 4 ay müddətinə həbs edilib. O, ittihamları rədd edib. Hüquq müdafiəçiləri onu siyasi məhbus kimi tanıyıblar.

2024-cü ilin fevralında məhkəmə onu 5 il 4 ay müddətinə azadlıqdan məhrum edib.

Rəşad Ramazanov 2013-cü ilin mayında da həbs edilmişdi və külli miqdarda narkotik maddənin qanunsuz dövriyyəsi ittihamı ilə 9 il azadlıqdan məhrum edilmişdi. 2019-cu ildə əfv edildi.

Yerli hüquq-müdafiə təşkilatları Rəşad Ramazanovu siyasi məhbus kimi tanıyaraq bildiriblər ki, həbsin əsl səbəbi hakimiyyətin din sahəsində siyasətinin sosial şəbəkələrdə tənqid edilməsidir.