Avropa İnsan Hüquqları Məhkəməsi (AİHM) azərbaycanlı ilahiyyatçı Taleh Bağırzadənin həyat yoldaşı Leyla İsmayılzadənin övladına seçdiyi adın qeydiyyata alınmaması ilə bağlı şikayətinə baxaraq ərizəni rədd edib.

“Azərbaycan Reallığı”nın məlumatına görə, 34 yaşlı Leyla İsmayılzadə Strasburq məhkəməsinə müraciət edərək iddia edib ki, oğlu üçün seçdiyi “Əbülfəzləbbas” adının qeydiyyata alınmaması onun şəxsi və ailə həyatına hörmət hüququnun (Avropa Konvensiyasının 8-ci maddəsi) pozulmasıdır.

O, dəfələrlə dövlət orqanlarına müraciət edərək övladına Kərbəla şəhidlərindən biri – İmam Hüseynin (ə) ögey qardaşı Əbülfəzl Abbasın şərəfinə bu adı vermək istədiyini bildirib. Lakin müraciətlər Azərbaycan Milli Elmlər Akademiyasının təsdiqlədiyi adlar siyahısında “Əbülfəzləbbas” adının yer almaması səbəbilə rədd edilib.

AİHM qərarında qeyd edib ki, ərizəçi Azərbaycan məhkəmələrinin qərarına uyğun olaraq uşağın adını “Abbas” kimi qeydiyyata alıb və bu səbəbdən onun hüquqlarının pozulması üçün əsas yoxdur. Məhkəmə nəticə olaraq Leyla İsmayılzadənin şikayətini əsassız hesab edib.

Xatırladaq ki, Taleh Bağırzadə 2015-ci ilin noyabrında baş vermiş “Nardaran hadisələri” zamanı saxlanılıb və sonradan ağır ittihamlarla məhkum edilib. O, uzun illərdir dini fəaliyyətinə və hakimiyyətə yönəlik çıxışları ilə tanınır.