Hazırda həbsdə olan ictimai-siyasi fəal Bəxtiyar Hacıyev ictimaiyyətə müraciət ünvanlayıb. Onun müraciəti oktyabrın 30-da “Azadlıq Qəzeti” tərəfindən dərc edilib.

Müraciətində Hacıyev bildirir ki, illərdir korrupsiya və haqsızlıqlara qarşı çıxış etdiyi üçün təzyiqlərə məruz qalıb: “2004-cü ildə təhsil sistemində korrupsiyaya etiraz etdim, 2007-ci ildə isə kommunal qiymətlərin artımına qarşı sayt yaratdım və 12 sutka inzibati həbsə məruz qaldım. Həmin il Harvard Universitetinə qəbul olunsam da, dövlət rəsmiləri təqaüddən imtina etməyimi tələb etdilər və mənə dövlət proqramı çərçivəsində maliyyə dəstəyi göstərilmədi.”

Siyasi fəal iddia edir ki, uzun illər ona qarşı aparılan kampaniyanın arxasında Prezident Administrasiyasının sabiq rəhbəri Ramiz Mehdiyev dayanıb: “2010-cu ildə deputatlığa namizəd oldum, faktiki qalib gəldiyim seçkidən dərhal sonra həbs edildim. 2019-cu ilə qədər üzləşdiyim polis təzyiqləri, həbslər və digər məhrumiyyətlər birbaşa Ramiz Mehdiyevin göstərişi ilə həyata keçirilirdi. O, məni daim ‘inqilabçı’ və ‘dövlət çevrilişinə hazırlaşan şəxs’ kimi təqdim edirdi. İndi isə illərdir mənə bu ittihamları yapışdıran Ramiz Mehdiyevin özünü eyni maddələrlə mühakimə edirlər.”

Bəxtiyar Hacıyev öz fəaliyyətinin dövlət maraqlarına zidd olmadığını vurğulayıb: “Mənə qarşı irəli sürülən ittihamlar saxtadır. Heç vaxt ölkənin maraqlarına zərbə vuran addım atmamışam. Mənim fəaliyyətim vətəndaş cəmiyyəti işidir, cinayət deyil.”

O həmçinin bildirib ki, bu gün də Ramiz Mehdiyevin keçmiş təsir dairəsində qalan şəxslər vətəndaş cəmiyyəti nümayəndələrinin, jurnalistlərin və hüquq müdafiəçilərinin həbsdə saxlanması üçün müxtəlif vasitələrdən istifadə edirlər.

Hacıyevin fikrincə, bu cür davranışlar Azərbaycanın Qərb ölkələri ilə strateji tərəfdaşlığına zərbə vurur, cəmiyyətdə narazılıq və aqressiya yaradır.

Xatırladaq ki, oktyabrın 14-də hökumətyönlü media Səbail Rayon Məhkəməsinin Prezident Administrasiyasının sabiq rəhbəri, Azərbaycan Milli Elmlər Akademiyasının keçmiş prezidenti Ramiz Mehdiyev barəsində 4 aylıq ev dustaqlığı qətimkan tədbiri seçdiyini xəbər verib. Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2 (cinayət yolu ilə əldə edilmiş əmlakı leqallaşdırma) maddələri ilə ittiham olunur.

Müraciətinin sonunda Hacıyev 44 günlük Vətən müharibəsinin 5 illiyi ərəfəsində ictimai barışıq çağırışı edib: “Ümid edirəm ki, sağlam düşünən dövlət adamları var və onlar Zəfər Bayramı ərəfəsində siyasi sifarişlə həbs edilmiş vətəndaş cəmiyyəti təmsilçilərinin, jurnalistlərin və digər məhkumların azadlığa buraxılması istiqamətində təşəbbüs göstərəcəklər.”

Qeyd edək ki, Bəxtiyar Hacıyev bu ilin yanvarın 13-də Bakı Ağır Cinayətlər Məhkəməsinin hökmü ilə 10 il azadlıqdan məhrum edilib. Onun evi və bank hesablarındakı vəsait müsadirə olunub, təlim-tədris fəaliyyəti ilə məşğul olması qadağan edilib. Hacıyev özünü təqsirli bilmir və sifarişlə həbs olunduğunu iddia edir.