Azərbaycan Xalq Cəbhəsi Partiyasının (AXCP) həbsdə olan üzvü — partiya sədri Əli Kərimlinin ictimai əsaslarla mühafizəçisi Kənan Zeynalovun cinayət işi üzrə məhkəmə prosesi başlayıb.

27 oktyabr tarixində “Facebook” səhifəsində paylaşım edən Əli Kərimli bildirib ki, Bakı Ağır Cinayətlər Məhkəməsində keçirilən iclasda Zeynalov həbsdən bəri 7 ay ərzində nə ailə üzvləri ilə üzbəüz görüşə, nə telefonla zəng etməyə, nə də dəyişmək üçün paltar qəbul etməyə imkan verilməyib.

Kərimlinin fikrincə:

“O, bu 7 ayda tam təcrid vəziyyətində saxlanılıb. Rejim ağır cinayətlər törətmiş terrorçuları belə Kənan bəy qədər kommunikasiyasız saxlamır… Məhkəmədə dedi ki, həbs olunanda əynində olan paltarla gəlib, indiyədək dəyişmək üçün paltar verilməyib…”

İddia olunur ki, Zeynalovun işində 2025-ci il martın 21-də Yeni Günəşli qəsəbəsində Anar Rəhimova qarın nahiyəsindən bıçaqla zərbə endirmə hadisəsi yer alıb. Zeynalov ÇM-nin 126.2.4-cü maddəsi üzrə (xuliqanlıq məqsədi ilə qəsdən ağır sağlamlıq zərəri vurma) təqsirləndirilir.

AXCP rəhbəri həmçinin qeyd edib ki, Zeynalov birinci Qarabağ müharibəsinin qazisidir, müharibədə xəsarət alıb, lakin əqidəsinə sadiq olduğu üçün hədə-şantajlara, təzyiqlərə məruz qalıb.

Məhkəmədə vəkilin istintaq materialları ilə tanış olmaması səbəbindən iclas 6 noyabr tarixinə təyin edilib.

Qeyd: AXCP-nin 15-ə yaxın üzvünün uzunmüddətli həbsdə olduğu bildirilir. Onlar ittihamları siyasi motivli adlandıraraq, həbslərin fəaliyyətlərinə görə yönəldiyini iddia edirlər.