Azərbaycan Milli Elmlər Akademiyasının (AMEA) İşlər idarəsinin sabiq müdiri, hazırda Rəyasət Heyəti Aparatının Sosial xidmətlər şöbəsinin müdiri vəzifəsində çalışan Elton Məmmədov barədə Baş Prokurorluq rəsmi məlumat yayıb.

Baş Prokurorluğun məlumatına görə, Elton Məmmədovun istintaq orqanına çağırılmadığı və hər hansı qanun pozuntusuna yol vermədiyi barədə mediada yayılan açıqlamaları həqiqətə uyğun deyil.

Qeyd olunub ki, AMEA-da baş verən qanunsuzluqlarla bağlı Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin 179.4 (xüsusilə külli miqdarda ziyan vurmaqla israf etmə) və 308.2-ci (ağır nəticələrə səbəb olan vəzifə səlahiyyətlərindən sui-istifadə etmə) maddələri üzrə istintaq aparılır.

İstintaq zamanı 3 milyon manat məbləğində büdcə vəsaitinin əsassız xərclənməsinə dair şübhələr müəyyən edilib. Görülən tədbirlər nəticəsində sözügedən vəsaitin Elton Məmmədov tərəfindən dövlət büdcəsinə tam şəkildə ödənilməsi təmin olunub.

Bununla yanaşı, mediada həqiqətə uyğun olmayan məlumatlar yaydığı və istintaqın obyektivliyinə xələl gətirə biləcək hərəkətlərinə görə Elton Məmmədov Baş Prokurorluğa dəvət edilərək ona qanunvericiliyin tələbləri izah olunub və rəsmi xəbərdarlıq edilib.