Ləğv edilmiş Azərbaycan Yüksəliş Partiyasının keçmiş sədri Anar Əsədlinin cinayət işi üzrə məhkəmə prosesi başa çatıb. Oktyabrın 24-də Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən iclasda zərərçəkmiş şəxslər A.Əsədlinin həbs olunması barədə vəsatət veriblər.

Məlumata görə, iki zərərçəkmiş təqsirləndirilən şəxsin dəymiş ziyanı ödəmədiyini bildirərək onun barəsində həbs qətimkan tədbirinin seçilməsini tələb edib. Məhkəmə vəsatəti təmin edib və Anar Əsədli məhkəmə zalında həbs edilib.

Anar Əsədli Cinayət Məcəlləsinin 178.3.2-ci (külli miqdarda ziyan vurmaqla dələduzluq) maddəsi ilə ittiham olunur. İş üzrə dörd nəfər zərərçəkmiş kimi tanınıb. Onlardan biri mərhum prezident Əbülfəz Elçibəyin keçmiş köməkçisi Oqtay Qasımovdur.

Xatırladaq ki, A.Əsədli 2023-cü ilin aprelində həbs edilmiş, eyni ilin iyulunda isə ev dustaqlığına buraxılmışdı. Daha sonra cinayət işi üzrə xitam qərarı verilsə də, Baş Prokurorluq həmin qərarı ləğv edərək istintaqı yenidən davam etdirmişdi.

Azərbaycan Yüksəliş Partiyası 2020-ci il dekabrın 6-da təsis olunmuş, Anar Əsədli isə qurultayda partiya sədri seçilmişdi. Partiya 2023-cü ilin iyununda fəaliyyətini dayandırdığını açıqlamışdı.