USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Nurlan Libre həbsxanadan məktub göndərdi: “Mən həqiqəti çatdırdığım üçün həbsdəyəm”
“Meydan TV işi” üzrə həbsdə saxlanılan jurnalist, “Portağal Media”nın direktoru Nurlan Libre (Qəhrəmanlı) Bakı İstintaq Təcridxanasından ictimaiyyətə müraciət edib. Məktub Toplum TV vasitəsilə yayılıb.
Jurnalist qeyd edir ki, saxlanılacağını əvvəlcədən bilsə də, son reportajını redaksiyaya çatdırmağa çalışırmış:
“Məni üç maskalı polis Nərimanovda saxladı və kameramı götürdü. Uzunmüddətli həbs olacağımı bilirdim, amma qorxmadım. Yeganə təəssüfüm reportajın redaksiyaya çatmamasıdır.”
Libre həbsinin siyasi xarakter daşıdığını bildirərək yazır:
“Mən həqiqəti insanlara çatdırdığım üçün həbsdəyəm. Həbsxana kartımda ‘jurnalist’, ‘Meydan TV’ yazılıb. Bunları oxuyanda qürur duyuram.”
O, məktubunda ölkədə müstəqil mediaya qarşı təzyiqlərin artdığını və jurnalistlərin hədəf alındığını vurğulayır:
“Bəlkə bu gün bizim həbsimiz nəticə verməyəcək. Amma gələcəkdə tarixdə qeyd olunacaq ki, ən çətin zamanda belə həqiqət susdurulmadı.”
Nurlan Libre həbsxanadakı vəziyyətdən də bəhs edib və çox sayda şəxsin “narkotik” və “silah” ittihamları ilə şərləndiyini bildirib:
“Burada gördüklərim acınacaqlıdır. Bu haqsızlıqlara göz yummayacağam. Zindandan yazmağa davam edəcəyəm.”
İttiham
Jurnalist bu ilin fevralında saxlanılıb və ona qarşı qaçaqmalçılıq ittihamı irəli sürülüb. O, ittihamları rədd edir və həbsinin peşə fəaliyyəti ilə əlaqəli olduğunu bildirir.
