Azərbaycan hökumətinin bu ilin əvvəlində bağlanması barədə qərar verdiyi “BBC”-nin Azərbaycan nümayəndəliyinin əməkdaşları ölkədə jurnalist fəaliyyətini davam etdirir.

Bu barədə oktyabrın 29-da “APA” Medianın İnkişafı Agentliyinə (MEDİA) istinadən məlumat yayıb.

Məlumata görə, Agentlik bildirib ki, “BBC Azərbaycanca”nın akkreditasiyası ləğv edildikdən sonra jurnalist fəaliyyətinin davam etdirilməsi qanunvericiliyin pozulması deməkdir.

“BBC Azərbaycanca”nın keçmiş əməkdaşlarının müxtəlif qurumlara media sorğuları göndərməsi və araşdırmalar aparması barədə yayılan məlumatlardan sonra MEDİA məsələ ilə bağlı açıqlama verib.

Qurumun cavabında qeyd olunur ki, hazırda “BBC”nin Azərbaycandakı nümayəndəliyinin fəaliyyəti üçün heç bir hüquqi əsas mövcud deyil:

“Bu səbəbdən Agentlik qanunsuz fəaliyyətin dayandırılmasını tələb etmək səlahiyyətinə malikdir.”

Həm MEDİA, həm də “APA” keçmiş əməkdaşların konkret hansı fəaliyyətlə məşğul olduqları barədə əlavə məlumat paylaşmayıb.

Xatırladaq ki, “BBC Azərbaycanca” 1994-cü ildə radio xidməti kimi fəaliyyətə başlayıb. 2011-ci ildə Azərbaycan hökumətinin qərarı ilə xarici radiostansiyaların FM dalğasında yayımına qadağa qoyulduqdan sonra xidmət onlayn media platformalarına keçib.

Bu ilin fevralında “BBC Azərbaycanca” hökumətin göstərişi ilə Bakıda yerləşən ofisini bağladığını açıqlamış və bu addımı “mətbuat azadlığına qarşı məhdudlaşdırıcı qərar” kimi qiymətləndirmişdi.