İmişli Rayon Ağsaqqallar Şurasının həbs edilən sabiq sədri Saleh Səmədovun üçüncü oğlu da işindən uzaqlaşdırılıb.

Saleh Səmədovun oğlu Mehralı Səmədov Strateji Obyektlərin Mühafizəsi Dövlət Agentliyində şöbə rəisi vəzifəsindən azad olunub.

Məlumata əsasən, onun digər iki qardaşı da bir müddət əvvəl vəzifələrindən kənarlaşdırılıblar. Onlardan biri Penitensiar Xidmətin 3 saylı məntəqə tipli cəzaçəkmə müəssisəsinin rəisi, digəri isə İmişli Rayon İcra Hakimiyyəti başçısının Yeni Bəhramtəpə İnzibati Ərazi Dairəsi üzrə nümayəndəsinin müavini vəzifəsində çalışırdı.

Bundan əlavə, bir neçə gün öncə Strateji Obyektlərin Mühafizəsi Dövlət Agentliyinin rəisi, general-mayor İlqar Abbasov da tutduğu vəzifədən azad edilib. Araşdırmalar nəticəsində onun da Saleh Səmədovla əlaqəsinin olduğu, hətta onu qurumun yaradılmasının 30 illiyinə həsr olunmuş medalla təltif etdiyi müəyyən edilib.

Qeyd edək ki, Saleh Səmədov bu il 9 may — Faşizm üzərində Qələbə Günü münasibətilə keçirilən tədbirdə SSRİ bayrağı altında, sinəsində “Georgi lenti” ilə çıxış etdikdən sonra ictimai narazılığa səbəb olmuşdu. Daha sonra o, Dövlət Təhlükəsizliyi Xidməti (DTX) tərəfindən mənimsəmədə ittiham olunaraq həbs edilib. Hazırda iş üzrə ibtidai istintaq davam edir.