“Bu, dövlət tərəfindən maliyyələşdirilməyən yeganə müstəqil informasiya agentliyi olan “Turan”a qarşı məqsədyönlü hücumdur”

“Turan” İnformasiya Agentliyi bəyanat yayıb. Agentlik bəyanatında bildirir ki, 2025-ci il fevralın 15-də və 18-də “Day.Az” saytında “Turan”ın fəaliyyəti ilə bağlı böhtan xarakterli iddialar irəli sürülən məqalələr dərc edilib.

Bu materiallarda müəllif agentliyi Qərb maliyyəsindən asılı və xarici strukturların maraqlarına tabe olan bir qurum kimi təqdim etməyə cəhd edib.

Agentlik bəyan edir ki, bu məqalələr “Turan”ın nüfuzdan salınmasına yönəlmiş dezinformasiyadır.

Həmçinin bildirilir ki, “Turan” müstəqil media qurumu kimi yalnız Azərbaycan qanunvericiliyi çərçivəsində və peşəkar, etik jurnalistika prinsiplərinə uyğun fəaliyyət göstərib və məqalələrdə təqdim olunan rəqəmlər, ittihamlar həqiqətə uyğun deyil.

““Turan” heç vaxt ABŞ-nin Beynəlxalq İnkişaf Agentliyindən (USAID) maliyyə almayıb. Müəlliflərin 2010-2020-ci illər arasında agentliyin hesablarına guya ən azı 2 milyon dollar köçürüldüyü barədə iddiaları tamamilə yalandır. 2015-2023-cü illər arasında agentliyin insan haqları və mətbuat azadlığı ilə bağlı “müstəqil” hesabatlar hazırlamaq üçün Milli Demokratiya Fondundan (NED) iri məbləğdə vəsait aldığı iddiası da əsassızdır. Turan NED-dən heç bir maliyyələ almayıb və göstərilən dövrdə bu qurum tərəfindən maliyyələşdirilməyib”, – Agentlik bildirir.

Əlavə olunur ki, məqalədə qeyd edilən maliyyə vəsaitləri ilə bağlı iddialar da əsassızdır:

“Məqalədə 2024-cü ildə “Turan” Avropa İttifaqının Azərbaycandakı nümayəndəliyindən 18,771 manat alındığı qeyd olunub. Müəlliflər həmçinin “Turan”ın Çexiyanın hərbi attaşesindən 68,946 manat aldığını və bu vəsaitin “abunəlik” adı altında gizlətdiyi barədə iddia irəli sürüb. Yazırlar ki, 2023-cü ildə Turanın gəliri 600,000 manatdan çox olub və bunun əhəmiyyətli hissəsi Avropa səfirlikləri və fondları, o cümlədən Avropa Demokratiya Fondu (EED), USAID və Qərb kəşfiyyat xidmətləri ilə əlaqəli strukturlardan daxil olub. Yazılanlar açıq şəkildə saxtakarlıq və böhtandır. Agentliyin gəliri qeyd olunan məbləğdən dəfələrlə az olub və yalnız informasiya məhsullarının satışı nəticəsində formalaşıb. “Turan” bu strukturlardan heç bir maliyyə almayıb”.

“Avropa Demokratiya Fondunun (EED) guya 2022-ci ildə agentliyə analitik materialların hazırlanması üçün 120 min avro ayırdığı iddiası tamamilə yalandır. EED heç vaxt “Turan”ı maliyyələşdirməyib. Məqalədə bildirilir ki, Fransa strukturları “Turan”ı fəal şəkildə dəstəkləyib, xüsusilə 2021-ci ildə agentlik “Mediazona” fondundan 50,000 avro alıb. Bu da növbəti saxta iddiadır- “Turan” “Mediazona” və ya oxşar qurumlardan heç vaxt maliyyə almayıb” , – bəyanatda deyilir.

Bildirilir ki, “Day.Az” fevralın 18-də yaydığı məqalədə “Turan”ın xidmətlərinin satışından əldə etdiyi qanuni gəliri “xarici maliyyələşmə” kimi təqdim etməyə çalışıb:

“Məqalədə 2020-2024-cü illər arasında “Turan”ın guya xaricdən 180,596 manat aldığı qeyd edilir və bu, xarici müdaxilənin sübutu kimi təqdim olunur. Lakin, əslində, bu agentliyin xəbər və analitik materiallarının satışından əldə etdiyi qanuni kommersiya gəlirləridir. “Turan”ın bank hesabına daxil olan bütün vəsaitlər tam şəffafdır və Azərbaycan qanunvericiliyinin tələblərinə tam uyğundur. Bu, dövlət tərəfindən maliyyələşdirilməyən yeganə müstəqil informasiya agentliyi olan “Turan”a qarşı məqsədyönlü hücumdur. “Day.Az” “Turan”ın mövqeyini öyrənmədən bu cür ciddi ittihamları dərc etməklə “Media haqqında” qanunu və jurnalist etikası prinsiplərini pozub”.

“Turan” “Media haqqında”qanuna uyğun olaraq “Day.Az”-dan cavab hüququnun təmin edilməsini və bu bəyanatı saytında dərc etməsini tələb edib.

“Biz agentliyin nüfuzunu qorumaq üçün hüquqi addımlar atmaq hüququmuzu özümüzdə saxlayırıq”, – bəyanatda qeyd edilib.

“Turan” İnformasiya Agentiyi 2025-ci il fevralın 13-də fəaliyyətini dayandırması barədə açıqlama yayıb.

Agentliyin direktoru Mehman Əliyev maliyyə çətinlikləri ilə üzləşdiklərini bildirib.

“Turan” 1990-cı ilin mayında bir qrup jurnalist tərəfindən Bakıda yaradılıb.

Agentlik xəbərlər, Azərbaycanla bağlı analitik məqalələr və icmallar hazırlayır. İnformasiya məhsulları siyasət, iqtisadiyyat, energetika, maliyyə, kommunikasiya, market, qanunvericilik, din, mədəniyyət, idman, fotomaterillar, məlumat və arxiv materiallarından ibarət bloklar şəklində təqdim olunur.