3 may – Ümumdünya Mətbuat Azadlığı Günü münasibətilə Norveçin “Narvesen” şirkətinin təşəbbüsü və Nobel Sülh Mərkəzi ilə əməkdaşlıq çərçivəsində hazırlanmış “The Forbidden Times” qəzetində Azərbaycanın müstəqil media platforması olan Toplum TV-yə həsr olunmuş geniş məqalə dərc edilib.

“Avtoritar ölkədə mətbuat azadlığı adına qeyd ediləcək çox şey yoxdur” başlıqlı məqalədə Azərbaycanda mətbuat azadlığının vəziyyəti, müstəqil jurnalistlərin üzləşdiyi təzyiqlər və xüsusilə “Toplum TV”nin hədəfə alınması ətraflı şəkildə təqdim olunub. Məqalə anonim jurnalistlər tərəfindən hazırlanıb və həmrəyliyin bir forması olaraq beynəlxalq oxuculara Azərbaycan reallığını çatdırmaq məqsədi daşıyır.

Məqalədə vurğulanır ki, Azərbaycanda ənənəvi media resursları hökumətin ciddi nəzarəti altındadır və müstəqil jurnalistika ilə məşğul olmaq həyati risklər daşıyan bir fəaliyyətə çevrilib. “Toplum TV” bu mənada simvolik nümunə kimi təqdim olunur – ofisi bağlanmış, əməkdaşları həbs edilmiş, bir çox jurnalisti ölkəni tərk etmək məcburiyyətində qalmış media qurumu olaraq.

Məqalədə bildirilir ki, Azərbaycan hakimiyyətinin 2023-cü ildən etibarən daha da sərtləşən repressiv siyasəti nəticəsində hazırda təxminən 25 müstəqil jurnalist həbsdədir və onlardan 8 nəfəri birbaşa “Toplum TV” işi çərçivəsində saxlanılıb.

Xatırladılır ki, 2023-cü ilin martında “Toplum TV”nin Bakıda yerləşən ofisinə reyd təşkil olunub və əməkdaşları saxlanılıb. Sonradan azadlığa buraxılan şəxslər olsa da, 8 jurnalist barəsində ilkin olaraq qaçaqmalçılıq, daha sonra isə vergidən yayınma və qanunsuz sahibkarlıq kimi ağırlaşdırılmış ittihamlarla cinayət işi açılıb.

Qəzetdə prezident İlham Əliyevin rejiminin tənqidçiləri hədəfə aldığı, onları “dövlət düşməni” və “anti-Azərbaycan qüvvələrinin əlaltısı” kimi təqdim etdiyi qeyd olunur. Məqalədə deyilir: “Hökumətin məqsədi açıqdır – tənqidi səsləri boğmaq, yeni jurnalistlərin bu peşəyə gəlməsinə mane olmaq və medianı tam nəzarət altına almaq.”

Toplum TV-nin həmtəsisçisi Ələsgər Məmmədlinin boğazında onkoloji şiş olması və bu səbəbdən ev dustaqlığına buraxılması tələbi ilə etdiyi çıxış da məqalədə yer alıb. O, məhkəmədə belə deyib: “Bu, mənim yaşamaq hüququmla bağlıdır. İş artıq başa çatıb. Mənim azadlıqda ola-ola məhkəməyə gəlməyimə nə mane ola bilər?”

Toplum TV-nin tarixinə də toxunulan yazıda, qurumun 2016-cı ildə Demokratik Təşəbbüslər İnstitutu çərçivəsində yaradıldığı və daha sonra müstəqil fəaliyyətini davam etdirdiyi qeyd olunur. Məqalədə Toplum TV-nin peşəkar jurnalistikanın prinsiplərinə sadiq qalaraq minlərlə obyektiv və qərəzsiz material dərc etdiyi bildirilir.

Sonda isə qeyd olunur ki, Toplum TV təqiblərə və təzyiqlərə baxmayaraq fəaliyyətini ölkə xaricində olan jurnalistləri ilə davam etdirir. “Biz kiçik bir komanda olsaq da, insanlara doğru xəbəri çatdırmaq üçün əlimizdən gələni edirik. Susmayacağıq,” – deyə Toplum TV əməkdaşları məqalədə vurğulayır.