“Toplum TV”-nin həbsdə olan əməkdaşı Fərid İsmayılov başladığı aclıq aksiyasını dayandırıb.

Bu barədə məlumatı jurnalistin yaxınları “Toplum TV”-yə veriblər. Bildirilib ki, Fərid İsmayılov aclığı dayandırması barədə ailəsinə telefon danışığı zamanı məlumat verib.

F. İsmayılov bildirib ki, artıq öz kamerasına qaytarılıb və tələbi yerinə yetirildiyi üçün aclığı dayandırıb:

“İndi bir az mədəm narahatdır, günlər sonra ilk dəfə sulu yemək yedim, amma halım yaxşıdır. Hər şey qaydasındadır”, – deyə jurnalist yaxınlarına bildirib.

Xatırladaq ki, Fərid İsmayılov yan kamerada saxlanılan məhbusun ölüm təhdidlərinə məruz qaldığını və təcridxana rəhbərliyinin bu məsələyə etinasız yanaşdığını bildirmişdi. Həmin məhbus qısa müddətlik başqa kameraya köçürülsə də, sonradan yenidən əvvəlki yerinə qaytarılmışdı. Ardınca İsmayılovun kamerası dəyişdirilmiş və o, buna etiraz olaraq aclıq aksiyasına başlamışdı.

Fərid İsmayılov həmçinin “Toplum TV işi” üzrə son məhkəmə iclasında da ölüm təhdidlərinə məruz qaldığını deyərək bunun təxribat xarakteri daşıdığını vurğulamış, təcridxana rəhbərliyindən məsələni araşdırmağı tələb etmişdi.