Azərbaycan Milli Məclisinin ilk sədri Rəsul Quliyevin ailə üzvləri 30 ildən sonra ilk dəfə Azərbaycana səfər ediblər.

Bu barədə Gələcək Azərbaycan Partiyasının sədri Ağasif Şakiroğlu məlumat verib.

Səfər proqramı Fəxri Xiyaban ziyarəti ilə başlayıb. Ailə üzvləri Ulu Öndər Heydər Əliyevin, görkəmli oftalmoloq-alim Zərifə xanım Əliyevanın, eləcə də digər dövlət xadimləri, ziyalılar və şəhidlərin məzarlarını ziyarət ediblər.

Rəsul Quliyevin qızı Xanım Hənna Bakı səfəri ilə bağlı təəssüratlarını sosial mediada paylaşıb:

“30 ildən sonra ailə üzvlərimlə birlikdə vətənimiz Azərbaycana gəldik. Gözəl Bakımızdayıq. Səfərimizin ilk gününü Fəxri Xiyabanı ziyarətlə başladıq. Müstəqil Azərbaycanımızın qorunub-saxlanılmasında və inkişafında böyük xidmətləri olmuş Heydər Əliyevin, həyat yoldaşı Zərifə xanım Əliyevanın və digər görkəmli şəxsiyyətlərin məzarlarını ziyarət etdik. Ardınca Şəhidlər Xiyabanında müqəddəs şəhidlərimizin xatirəsini ehtiramla yad etdik.
Bakımızı 30 ildən sonra yenidən görmək, burada həyata keçirilmiş quruculuq və abadlıq işlərini müşahidə etmək çox qürurvericidir. Paytaxtımız təkcə təmizliyi ilə deyil, zövq və gözəlliyi ilə də bir çox məşhur şəhərləri geridə qoyur.
Başda Müzəffər Ali Baş Komandan, Prezident İlham Əliyev olmaqla, hər kəsə təşəkkür edirik. Yüksək qonaqpərvərliyə görə minnətdarıq. Fəxr edirik ki, biz azərbaycanlıyıq.”