USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Jurnalist Teymur Kərimov və Nurlan Libre “Ümumdünya Mətbuat Azadlığı Günü”-də aclıq aksiyasına başladı
3 may – Ümumdünya Mətbuat Azadlığı Günü münasibətilə müstəqil jurnalist, “Portağal Media” xəbər kanalının təsisçi direktoru Nurlan Libre (Qəhrəmanlı) siyasi məzmunlu həbslərə etiraz olaraq aclıq aksiyasına başladığını bəyan edib. Jurnalist bu aksiyanın həm də həbsdə olan siyasi fəal Tofiq Yaqubluya həmrəylik məqsədi daşıdığını bildirib.
Nurlan Libre aksiyanın rəmzi hissəsi olaraq ağzını iynə ilə tikəcəyini elan edib. Bu simvolik addımın məqsədi onun sözlərinə görə dövlətdən və cəmiyyətdən bir mesaj verməkdir: “Məni yalnız özüm susdura bilərəm. Başqa heç kimin buna haqqı yoxdur!” deyə jurnalist qeyd edib.
Jurnalist əlavə edib ki, bu aksiyada tək deyil. Həbsdə olan digər bir jurnalist – Teymur Kərimov da aclıq aksiyasına başlayıb. Onun aksiyanın təşəbbüskarlarından biri kimi məsul tutulduğu və bu səbəbdən təzyiqlərə məruz qaldığı bildirilir.
Aksiyanın məqsədi təkcə fərdi etiraz deyil, eyni zamanda Azərbaycanda söz və mətbuat azadlığının vəziyyətinə diqqət çəkməkdir. Nurlan Libre bildirib ki, son dövrlərdə jurnalistlərə qarşı artan təzyiqlər, siyasi motivli həbslər və müstəqil medianın səsini kəsməyə yönəlmiş cəhdlər ciddi narahatlıq doğurur.
Qeyd edək ki, Ümumdünya Mətbuat Azadlığı Günü hər il 3 may tarixində qeyd olunur və bu günün əsas məqsədi mətbuat azadlığının qorunmasının vacibliyini xatırlatmaq, eyni zamanda bu sahədə baş verən pozuntuları gündəmə gətirməkdir.
Hazırda ictimaiyyətin və beynəlxalq təşkilatların bu aksiyaya hansı reaksiya verəcəyi maraqla gözlənilir.
