Azərbaycan Daxili İşlər Nazirliyinin “Rossiya Seqodnya” agentliyinin Bakı filialı — “Sputnik Azərbaycan” redaksiyasında keçirdiyi əməliyyat nəticəsində 7 nəfər saxlanılıb. Onlardan ikisi barəsində həbs-qətimkan tədbiri seçilib, digər beş nəfər isə cinayət məsuliyyətinə cəlb olunub. Hadisə Kremlin narahatlığına və açıq diplomatik təzyiqlərə səbəb olub.

Peskov: “Azadlıqlarına nail olmağa çalışacağıq”

Rusiya Prezidentinin mətbuat katibi Dmitri Peskov bildirib ki, Moskva məsələni Azərbaycan tərəfi ilə müzakirə etməyə hazırlaşır:

“Ümid edirik ki, ən yaxın zamanda Azərbaycan tərəfi ilə birbaşa əlaqələr zamanı onların azad edilməsinə nail ola biləcəyik”.

Bu bəyanat Kremlin “Sputnik Azərbaycan” vasitəsilə Bakıda nəzarətdə saxladığı informasiya platformasının sıradan bir media qurumu olmadığını, əksinə, siyasi və strateji alət kimi istifadə olunduğunu bir daha sübut edir.

Bakıdan sərt mesaj: Xarici təbliğatın sonu?

“Sputnik Azərbaycan” üzərində aparılan əməliyyat, Azərbaycan hakimiyyətinin son aylarda Rusiya təsir dairəsindən çıxmaq istiqamətində atdığı daha bir konkret addım kimi dəyərləndirilir. Bu, təkcə hüquqi məsələ deyil, həm də siyasi ritorikadır: Kremlin rəsmi təbliğatı Azərbaycanın daxili informasiya mühitində yer ala bilməz.

Hadisə Moskvanın dövlət nəzarətində olan media vasitəsilə region ölkələrinə yönəlik “yumşaq güc” siyasətinin Azərbaycanda ciddi şəkildə əngəlləndiyini göstərir.

Fon: Bakı ilə Moskva arasında artan gərginlik

“Sputnik Azərbaycan” əməkdaşlarının saxlanılması, iki ölkə arasında son aylarda müşahidə olunan gərginliyin tərkib hissəsidir. İstər Qroznı yaxınlığında AZAL təyyarəsinin şübhəli şəkildə zədələnməsi, istərsə də Yekaterinburqda azərbaycanlıların öldürülməsi və saxlanılması fonunda, Moskva-Bakı xəttində diplomatik münasibətlər nəzərəçarpacaq dərəcədə soyuyub.

Əvvəllər “Rus Evi”nin bağlanması, Azərbaycan deputatlarının Rusiyaya buraxılmaması, ardınca isə Azərbaycan tərəfinin Sputnik əməkdaşlarını cinayət məsuliyyətinə cəlb etməsi sübut edir ki, Bakı artıq informasiya və ideoloji suverenliyini qorumaq üçün daha sərt metodlara əl atmağa hazırdır.

Sual açıq qalır: Sputnik işi tək media əməliyyatıdırmı, yoxsa geosiyasi dönüş nöqtəsi?

Rusiya “Sputnik Azərbaycan”ın əməkdaşlarının azad olunmasını tələb edərkən, əslində yalnız jurnalistləri deyil, özünün regiondakı təsir imkanlarını müdafiə etməyə çalışır. Bakı isə görünür, bu təsirin daxili siyasi stabillik və informasiya təhlükəsizliyi üçün real təhdidə çevrildiyini anlayaraq, “rəqəmsal müstəqillik” yoluna çıxıb.

Bu olay Kremlin təsir dairəsindən uzaqlaşmaq istəyən digər region ölkələri üçün də presedent ola bilər. Amma əsas sual budur: Azərbaycan bu mövqeyində nə qədər davamlı və prinsipial olacaq?