USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Amnesty International” Azərbaycan və Rusiyada İnsan Hüquqlarının Pozulmasını Pislədi
Beynəlxalq insan hüquqları təşkilatı “Amnesty International” son günlər Azərbaycan və Rusiyada baş verən həbslərlə bağlı narahatlığını bildirib. Təşkilat hər iki ölkədə baş verən zorakı həbsləri insan ləyaqətinə və hüquqlara açıq hücum kimi qiymətləndirib.
“Amnesty International”ın Şərqi Avropa və Mərkəzi Asiya üzrə direktoru Mari Strazers bildirib ki, Rusiya və Azərbaycan hakimiyyətləri beynəlxalq insan hüquqları öhdəliklərini kobud şəkildə pozurlar:
“Beynəlxalq hüquqa əsasən, işgəncə və digər qəddar, qeyri-insani və ya ləyaqəti alçaldan rəftar qəti qadağandır. Baş verənlər milli və etnik mənsubiyyətə görə seçilən hədəflərə yönələn polis əməliyyatlarını xatırladır”.
Strazers əlavə edib ki, saxlanılan şəxslərin hüquqları, prosessual təminatlar və insan ləyaqətinə hörmət, siyasi gərginlik şəraitində belə qorunmalıdır:
“Rusiya və Azərbaycan hakimiyyətləri qeyri-qanuni qətllər, işgəncə və digər pis rəftar halları ilə bağlı iddiaları dərhal, hərtərəfli, müstəqil və qərəzsiz şəkildə araşdırmalı, məsul şəxsləri ədalət qarşısına çıxarmalıdır”.
Qeyd edək ki, iyunun 27-də Rusiyanın Yekaterinburq şəhərində iki azərbaycanlının öldürülməsi ilə başlayan gərginlik artmaqda davam edir. Hər iki ölkədə qarşılıqlı etnik hədəflənmə iddiaları fonunda həbs dalğası başlayıb.
Azərbaycanda “Sputnik Azərbaycan” saytının əməkdaşlarına qarşı cinayət işi açılıb, onlardan ikisi həbs olunub. İyulun 1-də isə Azərbaycanda 8 Rusiya vətəndaşı narkotik maddələrin qanunsuz dövriyyəsi və kiberdələduzluq ittihamları ilə saxlanılıb. Onların barəsində 4 aylıq həbs qətimkan tədbiri seçilib.
Saxlanma görüntülərinin hökumətyönlü mediada yayılması, saxlanılan şəxslərə qarşı zorakılıq izlərinin görünməsi və qanlı paltarlı fotolar ciddi narahatlığa səbəb olub.
İyulun 2-də Rusiyanın Azərbaycandakı səfiri Mixail Yevdokimov Azərbaycan Xarici İşlər Nazirliyinə çağırılıb. Görüş zamanı Azərbaycan tərəfi Rusiyanın “qeyri-dost addımları” ilə bağlı etirazını bildirib.
Hazırda hər iki ölkədə gərginlik yüksək olaraq qalır.
