Cəmiyyətdə tez-tez səslənən “siyasət çirkin peşədir” fikri ilə bağlı yayılan mülahizələrə münasibət bildirən ictimai-siyasi fəallar hesab edirlər ki, siyasətin özü deyil, onun içindəki neqativ davranışlı şəxslər ictimaiyyətdə mənfi təəssürat yaradır.

Onların fikrincə, rüşvətxor müəllim təhsili, pulgir həkim səhiyyəni, ədalətsiz hökm çıxaran hakim məhkəməni gözdən saldığı kimi, siyasətdə də naqis şəxslər bu sahəni çirkaba bulaşdırır.

“Əslində avtoritarizm bütün sahələrin çirkaba bulaşdırılmasıdır. Çünki təhsil də, səhiyyə də, məhkəmə də avtoritar idarəçiliyin xarakterinə uyğunlaşdırılır. Bir məmur oğrudursa, bir vəzifəli şəxs yalançıdırsa, bir müxalifətçi 50 dəfə sifət dəyişdiribsə, bu, siyasətin iyrəncliyi deyil, şəxslərin naqisliyidir”.

Tarixə nəzər salındıqda, Məhəmməd Əmin Rəsulzadənin adı çəkiləndə siyasətin qürur hissi yaratdığını xatırladan müəllif bildirir ki, əksinə, xalqı soyub talayan məmurun “vətənpərvərlikdən” danışması isə ikrah doğurur.

“Əhəmiyyətli olan odur ki, hər şeyə dəqiq diaqnoz qoyulsun. ‘Mən siyasətə qarışmıram’ deyiminin məşhurlaşması da ‘siyasət çirkin peşədir’ ifadəsinin təsirindən qaynaqlanır. Amma ölkədə baş verən neqativ hallara münasibət bildirmək siyasətə qarışmaq deyil və siyasətçi olmağa ehtiyac yoxdur”.

Qeyd olunur ki, siyasətə qarışmaq nə qəbahət, nə də anti-dövlət fəaliyyəti sayılmır. Əksinə, Konstitusiyada “hakimiyyətin mənbəyi xalqdır” müddəası yazılıbsa, vətəndaşların baş verənlərə biganə qalması səhv və anti-vətəndaşlıq mövqeyi hesab edilməlidir.

“Çirkabları, çirkinlikləri təmizləyəndə, bütün sahələr kimi siyasət də təmiz olur, təmiz qalır”.