30 iyun 2025-ci il, saat 10:00-da, Bakı Ağır Cinayətlər Məhkəməsində son dövrlərdə cəmiyyətdə geniş rezonans doğuran cinayət işi üzrə növbəti məhkəmə iclası keçiriləcək. Məhkəmə prosesi açıqdır və istənilən şəxs iştirak edə bilər.

Bu məhkəmə işi bir müddətdir ki, ictimaiyyətin diqqət mərkəzindədir. Təqsirləndirilən şəxslərin və onların hüquqlarını müdafiə edən vəkillərin və ya nümayəndələrin fikrincə, bu proses təkcə hüquqi deyil, eyni zamanda vicdan və ədalət məsələsidir.

Məhkəmə zalında baş verənlər sadəcə bir cinayət işinin gedişatı deyil, həm də həqiqət, sevgi və vicdanın yalan və nifrətə qarşı mübarizəsi kimi qiymətləndirilir.

Qeyd edək ki, III Respublika Platformasının qurucu üzvü, siyasi fəal Ruslan İzzətli “Toplum işi” çərçivəsində irəli sürülmüş ittihamlarla artıq bir neçə aydır ki, həbsdə saxlanılır. Hüquq müdafiəçiləri onun saxlanılmasını siyasi motivli hesab edir və azadlığa buraxılması üçün çağırışlarını davam etdirirlər.

Ruslan İzzətli bu ilin mart ayında hüquq-mühafizə orqanları tərəfindən saxlanılıb və CM-nin 206.3.2-ci (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddəsi ilə ittiham olunub. Məhkəmə onun barəsində 4 aylıq həbs qətimkan tədbiri seçib. Həmin müddət daha sonra uzadılıb.