İngiltərədə meningokok infeksiyası ilə bağlı yoluxma halları qeydə alınıb və məsələ epidemioloji nəzarətə götürülüb.

Böyük Britaniyanın Səhiyyə Təhlükəsizliyi Agentliyinin məlumatına görə, Kent bölgəsində, xüsusilə Kenterberi ətrafında əvvəlcə 34 yoluxma halı müəyyən edilsə də, laborator yoxlamalardan sonra bu rəqəm 23 təsdiqlənmiş hal kimi dəqiqləşdirilib.

Mütəxəssislər bildirir ki, meningokok infeksiyası nadir rast gəlinən, lakin sürətlə ağırlaşa bilən xəstəlikdir. Xəstəlik əsasən meningit və sepsisə səbəb olur, yüksək hərarət, güclü baş ağrısı, boyun sərtliyi, qusma, şüur bulanıqlığı və dəridə səpgilərlə müşayiət olunur.

Yoluxmaların əsasən Kent bölgəsində cəmləşməsi və bəzi halların tələbə mühiti və ictimai məkanlarla əlaqəsinin araşdırılması infeksiyanın yayılma mexanizmini müəyyənləşdirmək məqsədi daşıyır.

Rəsmi qurumlar vəziyyətin nəzarət altında olduğunu, geniş əhali üçün riskin aşağı qiymətləndirildiyini bildirir. Yoluxmuş şəxslərlə təmasda olanlara profilaktik antibiotik müalicəsi tətbiq olunur, risk qrupları üçün peyvəndləmə tədbirləri genişləndirilir.

Hazırda vəziyyət səhiyyə qurumları tərəfindən izlənilir və infeksiyanın yayılmasının qarşısının alınması istiqamətində tədbirlər davam etdirilir.