Minatəmizləmə fəaliyyəti zamanı partlayıcı sursatların işə düşməsi nəticəsində həlak olan və ya aldığı xəsarətdən həyatını itirən minatəmizləyənlərin ailə üzvlərinə Azərbaycan Respublikası Prezidentinin təqaüdü veriləcək. Bununla bağlı Prezident İlham Əliyev Fərman imzalayıb.

Fərmana əsasən, minatəmizləmə zamanı baş verən bədbəxt hadisə nəticəsində həlak olan şəxslərin ailə üzvlərinə aylıq 700 manat məbləğində Prezident təqaüdü ödəniləcək. Təqaüd ailə üzvlərinin sayına uyğun olaraq bərabər hissələrə bölünəcək.

Təqaüd dul həyat yoldaşına, valideynlərə, 18 yaşına çatmamış övladlara (təhsil alanlar üçün 23 yaşadək), əlilliyi olan övladlara, uşaq evlərində tərbiyə olunan qardaş və bacılara, eləcə də birinci növbədən digər qohumları olmayan baba və nənələrə şamil ediləcək.

Ödənişlər dövlət büdcəsində Əmək və Əhalinin Sosial Müdafiəsi Nazirliyi üçün nəzərdə tutulmuş vəsait hesabına həyata keçiriləcək. Fərman qüvvəyə mindiyi tarixədək minatəmizləmə fəaliyyəti zamanı həlak olan şəxslərin ailə üzvlərinə də şamil olunacaq və ödənişlər qüvvəyə mindiyi tarixdən sonrakı dövr üçün veriləcək.

Nazirlər Kabinetinə fərmandan irəli gələn məsələlərin həlli tapşırılıb.